२६ मंसिर , काठमाण्डौ ।
नेपाल प्रिमियर लिग (एनपीएल)को दोस्रो सिजनको च्याम्पियन घोषणा हुन् अब एक दिन मात्रै बाँकी छ । ८ टोली मध्ये २ टिमले फाइनलमा स्थान बनाएका छन् भने दुई पटक अवसर पाएर पनि विराटनगर फाइनलमा पुग्नबाट बन्चित भएको छ ।
लिग चरणमा सुदूरपश्चिमको खेल उत्कृष्ट रह्यो । यो टोलीले ७ खेलमा ६ जित निकाल्यो । फाइनलसम्म पुग्दा सुदूरपश्चिमलाई पराजित गर्ने एकमात्रै टिम विराटनगर हो । सबैभन्दा कमजोर साबिक विजेता जनकपुर बोल्ट्स देखियो ।
सातमा एक खेल मात्रै जितेर यो टोली तालिकाको पुछारमा पुग्यो । साबिक विजेता जनकपुरका लागि यो सिजन बिर्सनलायक बन्यो । ८ टोली मध्ये केहीका कप्तानहरूको प्रदर्शन उत्कृष्ट रह्यो भने केहीको प्रदर्शन मध्यम र केहीको बिर्सनलायक देखिएको छ ।
प्रमुख उपाधि दाबेदार मानिएको दीपेन्द्रसिंह ऐरी कप्तानीको सुदूरपश्चिम रोल्यस विराटनगर किङ्सविरुद्ध मात्रै कमजोर देखियो । ४९ बल रहँदै ६ विकेटले उक्त खेल हार्दा तालिकमा तेस्रो स्थानमा रहेको विराटनगर दोस्रो स्थानमा उक्लियो ।
फलत ः यो टिमले पहिलो क्वालिफायरमा यही टोलीको सामना गर्यो । तर दोस्रो पटक क्वालिफायरमा भेट भएको विराटनगरले हार्यो । अलडाउन्डर मध्यक्रममका ब्याटर दीपेन्द्रको सम्झनलायक इनिङ भनेको कर्णालीविरुद्ध थियो ।
यस खेलमा पहिला ब्याटिङमा उत्रिएको सुदूरपश्चचिमले निर्धारित २० ओभरमा ९ विकेट गुमाएर १३९ रन बनाएको थियो । जारी सिजनमा सुदूरपश्चिमले बनाएको यो कम स्कोर हो । सुरुवातीक्रमका ब्याटरहरू सस्तैमा आउट हुँदा दीपेन्द्रले यो इनिङ सम्हाले ।
सुदूरपश्चिम ८ ओभरको तेस्रो बलमा ४ विकेटको क्षतिमा ४६ रनको अवस्थामा हुँदा दीपेन्द्र क्रिजमा आएका थिए । उनले २८ बलमा ३९ रन जोड्न १ चौका र २ छक्का प्रहार गरे । उनैले सर्वाधिक बढी रन जोडे ।
सुदूरपश्चिमको इनिङ थोरै उकासियो । यस खेलमा दीपेन्द्रले कर्णालीका ४ विकेट लिए । उनले ओपनरद्वय प्रियांक पञ्चाल र मार्क वाटको महत्त्वपूर्ण विकेट लिएका थिए। उनको अलराउन्ड प्रदर्शनले यो खेल सुदूरपश्चिमको पक्षमा गएको हो ।
लिग चरणमा उनले सबैभन्दा बढी विकेट र रन बनाएको खेल यही हो । उनले काठमाडौं गोर्खाजसँगको खेलमा पनि ३० बलमा ३९ रन जोडे । अन्य खेलमा उनको प्रदर्शन जितका लागि अरु खेलाडीलाई साथ दिन मात्रै सीमित भयो ।
विराटनगरसँगको खेलमा उनको बलिङ फितलो बन्यो । २ ओभर बलिङ गर्दा उनले विकेटविहीन रहँदै ३८ रन खर्चिए । यस इनिङमा उनको ब्याटिङ पनि चलेन । विराटनगर किङ्सका कप्तान सन्दीप लामिछाने जारी सिजनको लिग चरणमा सर्वाधिक १७ विकेट लिने बलर हुन् ।
प्रतियोगिता पहिलो क्वालिफायरमा पुग्दा सन्दीपलाई सुदूरपश्चिमका अविनाश बोहोराले उछिनेका थिए । तर उनले दोस्रो क्वाफायरमा २ विकेट लिँदै उनलाई उछिने । तर टिमलाई भने फाइनलसम्म पुर्याउन सकेनन् ।
राष्ट्रिय टिमका पूर्वकप्तान तथा विराटनगरका कप्तान स्पिन बलर लामिछानेले काठमाडौं गोर्खाजविरुद्ध सबैभन्दा कम १ विकेट र जनकपुरविरुद्ध सबैभन्दा बढी ४ विकेट लिए । उनलै सबै खेलमा पूरै चार ओभर बलिङ गरेका छन् ।
काठमाडौंविरुद्ध उनले एक विकेट लिँदा २४ बलमा २६ रन दिए । उनले बलभन्दा बढी रन दिएको इनिङ यही हो । लिगकै सबैभन्दा बलियो देखिएको सुदूरपश्चिम रोयल्सविरुद्ध उनले ३ विकेट लिए ।
उनले २४ बलमा २० रन मात्रै दिए । बलिङमा सन्दीप निर्णायक बन्दा सुदूरपश्चिमको अपराजित यात्रामा ब्रेक लागेको थियो । जनकपुर बोल्ट्सविरुद्ध विराटनगरको जित निकाल्न सन्दीपले चार विकेट लिए ।
जारी सिजनमा उनले सर्वाधिक विकेट र कसिलो बलिङ गरेको इनिङ यही हो । लुम्बिनीसँग हारेको खेलमा उनले चार ओभर बलिङ गर्दा २ विकेटसहित २० रन मात्रै दिए । चितवन राइनोजसँग हारेको खेलमा सन्दीपले ४ ओभर बलिङ गर्दा २ विकेट लिएर २४ रन दिए ।
लुम्बिनीसँगको खेलमा सन्दीपले २ विकेट लिए तर विराटनगरका ब्याटरहरू नचल्दा यो खेल लुम्बिनीको पक्षमा गयो । विराटनगर फाइनलमा नपुगेपछि सर्वाधिक विकेटधारी सन्दीपलाई सर्वाेत्कृष्ट खेलाडी मध्ये एकका रुपमा हेरिएको छ ।
कर्णाली याक्सका कप्तान सोमपाल टिमकै भरोसा भएका फास्ट बलर हुन् । तर, समग्रमा उनको बलिङ कमजोर देखिएको छ । सात इनिङमा १४४ बल फ्याँक्दा उनले २१६ रन खर्चिए । सोमपालले यस सिजन ९ विकेट लिए । पोखरा एभेन्जर्स र काठमाडौं गोर्खाजविरुद्ध उनी विकेटविहीन रहे ।
उनको फितलो प्रदर्शन पोखराविरुद्ध रह्यो । उनले त्यस इनिङमा २४ बलमा ५० रन खर्चिए भने विकेट लिन सकेनन् । काठमाडौंविरुद्ध सोमपालको बलिङ कमजोर देखियो । यस इनिङमा उनले १८ बल फ्याँक्दा ३५ रन खर्चिए भने विकेट हात पारेनन् ।
जनकपुरविरुद्धको इनिङमा मात्रै सोमपालले बलभन्दा कम रन दिए । जसमा २ ओभर बलिङ गर्दा ११ रन दिए । एक विकेट पनि लिए । सोमपालले सर्वाधिक विकेट लिएको इनिङ सुदूरपश्चिमविरुद्धको हो ।
त्यसबेला उनले २४ बलमा ३२ रन खर्चिए ३ विकेट लिए । उनी कुनै खेलमा जितको निर्णायक बन्न सकेनन् । काठमान्डु गोर्खाजका कप्तान तथा बलर करण केसीले ८ खेलमा १७३ बल फ्याँक्दा २१४ रन खर्चिएर १३ विकेट लिएका छन् ।
उनी सर्वाधिक विकेट लिने खेलाडीको पाँचौ स्थानमा छन् । उनले सुदूरपश्चिम रोयल्सविरुद्ध उत्कृष्ट बलिङ गरे । ४ ओभर बलिङ गर्दा उनले ४ विकेट लिएर ३० रन खर्चिए । तर, पनि यस खेलको जित विपक्षीको हातमा गयो ।
चितवनसँगको खेलमा करणले ओपनर दीपक बोहोरलाई शून्यमै आउट गराए । यस खेलमा ४ ओभर बलिङ गर्दा २ विकेट लिएर २३ रन दिए । बलभन्दा कम रन दिएको उनको इनिङ यही हो ।
कर्णालीविरुद्ध ४ ओभर बलिङ गर्दा उनले १ विकेट लिँदै २६ रन खर्चिए । पोखरासँगको खेलमा कप्तान तथा ओपनर कुशल भुर्तेलको विकेट पनि करणले नै लिए । त्यस खेलमा उनले २ विकेट लिएर २५ रन दिए ।
विराटनगरसँगको खेलमा ओपनर लोकेश बमको विकेट पनि करणले नै लिए । काठमाडौंले हारेको यस खेलमा करणले ३ ओभर १ बल फ्याँक्दा २८ रन खर्चिएर १ विकेट लिए । जनकपुरविरुद्धको खेलमा भने करणको बलिङ कमजोर देखिन्छ ।
उनले लुम्बिनी लायन्सविरुद्ध ४ ओभर बलिङ गर्दा एक विकेट लिँदै ३६ रन खर्चिए । चितवन राइनोजका कप्तान तथा ब्याटर कुशल मल्लको प्रदर्शन यस सिजनमा बिर्सनलायक रह्यो । उनको ब्याटिङ कुनै खेलमा पनि चलेन ।
उनले बनाएको सर्वाधिक ३० रन हो । जनकपुरसँगको त्यो खेलमा पनि चितवनले हा¥यो । बलिङमा पनि उनी कमजोर देखिए । विराटनगरविरुद्धको खेलमा उनले ३ ओभर ५ बल फ्याँक्दा ४६ रनसम्म खर्चिए ।यो सिजनमा कुशलको न ब्याटिङ चल्यो न बलिङ ।
पोखरा एभेन्जर्सका कप्तान तथा ब्याटर कुशल भुर्तेलको यस सिजनमा प्रदर्शन सुखद हुन सकेन । तर पनि उनले २ खेलमा अर्धशतक प्रहार गरे । मजबुत देखिएका सुदूरपश्चिम र विराटनगर जस्ता टोलीविरुद्ध उनले अर्धशतक प्रहार गरेका हुन् ।
तर, पोखराले यी दुवै खेल भने हा¥यो । कुशल दुई खेल लुम्बिनी र जनकपुरविरुद्ध डक आउट भए । अन्यमा उनको प्रदर्शन सम्झनलायक छैन । नेपाली राष्ट्रिय टिम र लुम्बिनी लायन्सका कप्तान रोहित पौडेलको ब्याटिङ एनपीएलको यस सिजनमा मध्यम देखिन्छ ।
उनले कर्णालीविरुद्ध सर्वाधिक ४९ रन जोडे । यो खेलको जित लुम्बिनीको पक्षमा परेन । पोखराविरुद्ध उनले सर्वाधिक दोस्रो ४० रन बनाए । यस इनिङमा उनले लुम्बिनीबाट सर्वाधिक रन बनाएका थिए ।
उनको रनको आडमा लुम्बिनीले खेल जित्यो । जनकपुरविरुद्ध सर्वाधिक ३४ रन बनाए । यही खेल जितेर लुम्बिनीले प्लेअफमा स्थानमा बनाएको हो । यो महत्त्वपूर्ण खेलमा उनकै ब्याटिङले लुम्बिनीले जितेको हो ।
लुम्बिनीले रोहितको ३९ रनको साथमा चितवनविरुद्ध जित निकाल्यो । विराटनगरविरुद्ध समूह चरणमा उनी शून्मै आउट भए । यद्यपि विराटनगरसँगको हिजो दोस्रो क्वालिफायरमा भने रोहितको दोस्रो सर्वाधिक ३४ रन निर्णायक बन्यो ।
यससँगै रोहित सर्वाधिक रनकर्तामा तेस्रो स्थानमा उक्लिएका छन् । उनले ९ खेलमा २६० रन जोडेका छन् । यद्यपि उनले शतक र अर्धशतक भने प्रहार गर्न सकेनन् । एनपीएलमा उनलाई सर्वाेत्कृष्ट खेलाडी मध्ये एकका रुपमा हेरिएको छ।
साबिक विजेता जनकपुरले अनिल साहको कप्तानीमा पोखरा, विराटनगर र काठमाडौंविरुद्धको तीन खेल मात्रै खल्यो । उनको कप्तानीको विषयमा आलोचना भएपछि जनकपुरले कप्तानको जिम्मेवारी अन्य दुई खेलाडीलाई दियो ।
जनकपुरका अनिल साहको यो वर्ष ब्याटिङ र बलिङ दुवै फ्लप भएको छ । यो टिमले एक मात्रै जित निकालेको छ ।
