एजेन्सी, माघ २२
सस्तो आयातबाट आन्तरिक उत्पादकलाई बचाउन भारतले ९९ चिनियाँ सामाग्रीमा अतिरिक्त कर लगाएको छ । भारतीय संसद लोकसभामा जनवरी २८ देखि यो व्यवस्था लागू भएको जानकारी दिइएको छ ।
भारतीय वाणिज्य तथा उद्योगमन्त्री सीआर चौधरीले लोकसभामा दिएको लिखित बयानमा रसायन र पेट्रोकेमिकल्स, फाइबर र धागो, मेशिनरी सामग्री, रबर र स्टीललगायत सामग्रीमा कर लगाइएको उल्लेख छ । चौधरीले समस्या समाधानका लागि चीनमा भारतीय निर्यात सहज बनाउने बारे वार्ता भइरहेको बताएका छन् ।
भारत चीनतर्फ हुने निर्यात बढाउँदै व्यापार घाटा कम गर्ने योजनामा छ । गतवर्षको अप्रिलदेखि डिसेम्बरसम्मको अवधिमा भारतले चीनबाट ५३ अर्ब ८७ करोड डलरबराबरको सामाग्री आयात गरेको थियो । अघिल्लो वर्षको सोही अवधिमा भने भारतले चीनबाट ७६ अर्ब ३८ करोड डलरको सामग्री आयात गरेको थियो ।
