विराटनगर, बैशाख १६
बेवारिसे अवस्थामा मिक्लाजुङ गाउँपालिका–६ स्थित नुनसरी–बक्राहा खोलामा एउटा अत्याधुनिक हतियार एम १६ ए टु गोली सहित माटोले पुरिएको अवस्थामा भेटिएको छ ।
मोरङ प्रहरी प्रमुख एसपी मनोजकुमार केसीका अनुसार फेला पारिएकोे हतियार इलाका प्रहरी कार्यालय उर्लाबारीमा राखेर अनुसन्धान भईरहेको छ । अत्याधुनिक हतियार राईफल सहित म्यागजिन र त्यसमा लोड हुने पाँच राउण्ड गोली सहित भेटिएको के.सी.ले बताएका छन् ।
नेपाली सेनाले चलाउँदै आएको हतियार माटोले पुरिएकोको अवस्थामा फेला पारिएको जिल्ला प्रहरी कार्यालय मोरङ डिएसपी घनश्याम श्रेष्ठले बताएका छन् । फेला पारिएको उक्त हतियारको खिया लागिसकेको र त्यसका अधिकाश भागहरु काम नलाग्ने अवस्थाको रहेको श्रेष्ठले जानकारी दिएका छन् ।
यस्तो क्यालिवर ५.५६ एमएम र ७४६२५६२ नम्बरको हतियार अमेरिकामा बनाइने गरेको र हतियारमा प्रोपर्टी अफ युएस गभरमेन्ट लेखिएको भेटिएको श्रेष्ठले बताएका छन् । प्रहरीले द्वन्द्धकालमा सेनाले नेपालमा ल्याएको हतियार माओवादीले त्यस बेला लुटेको हुन सक्ने आशंका गरेका छन् ।
