विराटनगर, वैशाख १७
दुई बर्ष अघि आएको वाढीले भत्काएको पुल अहिलेसम्म नबन्दा मोरङ बेलबारीका स्थानीयबासीलाई आवज जावतमा समस्या भएको छ । २०७४ साउन २८ गते निरन्तरको बर्षापछि लोहन्द्रा खोलामा आएको बाढीले बेलवारी नगरपालिका ६ स्थित लोहन्द्रा खोलाको पुल भत्काएको थियो । पुल भत्काएको दुई बर्ष सम्मपनि पुल निर्माण नहुदा बेलबारी नगरपालिका १,२,३ र ५ नं वडाका स्थानीय घण्टौ समय लगाएर बैकल्पिक मार्ग प्रयोग गरी बिराटनगर, कानेपोखरी लगायतका स्थानमा जानु पर्ने बाध्यता रहेको छ ।
स्थानीय राम कामतले पुल निर्माण नहुदा बिरामी लिएर एम्बुलेन्स लगायतका साधान पनि पूर्व पश्चिम राजमार्ग प्रयोग गरी बिराटनगर जानुपर्ने वाध्यता रहेको बताए ।
हिंउँदको समयमा त खोलाको वगर प्रयोग गरी सवारी साधन गुड्ने गरेका छन,कामतले भने,‘बर्खाको याममा सिमानाको गाउँसंगको आउँ जाउँपनि बन्द हुन्छ,केही आपत प¥यो भने,खोलापारीको गाँउ पुग्न कम्तिमा तिन घण्टा लाग्छ । ’उनले पुल नहुदा बर्खाको बेलामा विधार्थीहरुलाई विद्यालय पुग्न पनि सकस हुने गरेको बताए ।
त्यस क्षेत्रका स्थानीयका अनुसार जिल्ला सदरमुकाम बिराटनगर पुग्न बढीमा १ घण्टाको समय लाग्ने गरेको भएपनि पुल नहुदाँ पूर्व पश्चिम राजमार्गको लक्ष्मीमार्ग सडक खण्डको सडक मार्ग प्रयोग गरी इटहरी हुदै बिराटनगर पुग्नु पर्ने बाध्यता रहेको बताए ।
यता सुनसरी–मोरङ सिचाई आयोजनाले भने पुल निर्माणको लागि विस्तृत अध्ययन प्रतिवेदन तयार भईसकेको जनाएको छ । आयोजनाले पुल निर्माणको लागि लागत अनुमान तयार पर्ने काम सकिएको जनाएको छ । आयोजनाले अबको दुई बर्षभित्र पुल निर्माणको काम सक्ने लक्ष्यसहित डिपिआर तयार गरिएको बताएको छ । ०७४ को बाढीले लोहन्द्रा खोलाको १ सय ७७ मिटर लामो पुल र पुल मुनिको नहर समेत वगाएको थियो ।
