विराटनगर, वैशाख १७
चाडबाडका समयमा मात्रै अनुगमन गरिने भन्दै आलोचना खेप्दै आएको विराटनगर महानगरपालिकाले सडक पेटी मिचेर विक्रीकालागि राखिएका बस्तु नियन्त्रणमा लिएको छ ।
मंगलबार अनुगमनका लागि निस्किएको महानगरपालिकाको टोलीले सडक पेटीमा राखिएका फेन्सी सामाग्रीका साथै सडक नै अवरुद्ध हुने गरी राखिएका निर्माण सामाग्री समेत नियन्त्रणमा लिएको छ ।
सडकको पेटीमै बिक्रीका लागि सामाग्री राखेर ब्यापार गर्ने प्रबृतिलाई निरुत्साहित गर्न महानगरले मंगलबार नगरक्षेत्र भित्रका विभिन्न सडकहरुको अनुगमन गरेको हो ।
टोलीले नगरक्षेत्रको मुख्य बजारसहित कालोपत्रे र सडक पेटी निर्माण भइसकेका क्षेत्रहरुको अनुगमन गरेको छ । महानगरपालिकाकी उपमेयर इन्दिरा कार्की,प्रमुख प्रशासकीय अधिकृत एकदेव अधिकारीसहित कर्मचारी र नगर रक्षकहरुको टोलीले स्थानीय बाटा रोड, जलजला मोडका सडक पेटीहरुको अनुगमन गरेको छ ।
अनुगमनको क्रममा कयौं ब्यापारीहरुले सडक पेटीमै सामाग्री राखेर बिक्री गर्ने गरिएको भेटिएको छ । महानगरपालिकाले यसअघि पटकपटक माईकिंग गराएर तथा पसलपसलमा प्रतिनिधि पठाएर सडक पेटीमा सामाग्री नराख्न अनुरोध गरेपनि ब्यापारीहरुले अटेर गरेको अनुगमनको क्रममा फेला परेको थियो । बाटा रोडका कयौं ब्यापारीहरुले सडक पेटीमै सामाग्री राखेको फेला परेको नगर रक्षकहरुको टोलीले त्यस्ता बस्तु नियन्त्रणमा लिएको छ ।
महानगरपालिकाको टोलीले फुटपाथ अवरुद्ध गरेको भन्दै बाटा रोडको लक्ष्मी क्लोथ स्टोर र गिरधारि कपडा पसल लगायतका पसलहरुको फुटपाथमा राखिएका सामाग्री नियन्त्रणमा लिएको छ ।
महानगरपालिकाका उपमेयर इन्दीरा कार्कीले पटकपटकको सुचनालाई अटेर गरेपछि फुटपाथमा राखिएका सामाग्री नियन्त्रणमा लिएको बताइन् ।
यस्तै महानगरपालिकाका प्रमुख प्रशासकीय अधिकृत एकदेव अधिकारीले महानगरलाई ब्यवस्थित गर्नु महानगरबासीको पहिलो कर्तब्य रहेको बताए ।
उनले अब उपरान्त महानगरपालिका कडारुपमा प्रस्तुत हुने चेतावनी दिए । नियन्त्रणमा लिइएका सामाग्रीका धनीलाई नियमानुसारको जरिवाना गरिने उनले जानकारी दिए ।
