विराटनगर, वैशाख २२
विश्व चर्चित कार्ल मार्क्सको २०१औँ जन्मजयन्ती नेपालमा पनि विभिन्न कार्यक्रम गरी मनाइँदै छ । आजभन्दा २ सय १ वर्षअघि अर्थात् ५ मे, १८१८ मा विश्व विख्यात दर्शनशास्त्री तथा कम्युनिष्ट विचारका प्रणेता कार्ल मार्क्सको जन्म भएको थियो ।
पुँजीवाद उत्कर्षमा पुगेको आजको विश्वमा सिर्जित समस्याहरू समाधान गर्दै नयाँ संसारको निर्माण गर्न उनले विश्वलाई दिएको दर्शनशास्त्रको आज पनि उत्तिकै महत्व छ। मार्क्सको २ सय १औँ जन्मजयन्ती मनाउन र मार्क्सवादलाई मन्थन गर्ने लहर अहिले विश्वभर चलेको छ ।
कार्ल मार्क्स आधुनिक विश्वका सबैभन्दा प्रभावशाली राजनीतिक दार्श्िनक मानिन्छन् । सन् १८४८ मा २९ वर्षको उमेरमै मार्क्सले फ्रेडेरिक एङ्गेल्ससँग मिलेर कम्युनिष्ट पार्टीको घोषणा पत्र लेखेर संसार हल्लाएका थिए ।
उक्त घोषणा पत्र संसारमा सबैभन्दा बढी पढिएको र प्रयोगमा ल्याइएको दस्तावेजमा पर्छ । राजनीतिक क्षेत्रमा समेत यसको महत्व बढेर गएको छ । घोषणापत्रले पुँजीवादी विश्व समाज कसरी परिवर्तन हुन्छ र शोषणरहित र पूर्ण रूपमा मुक्त समाजको निर्माण कसरी सम्भव छ भन्ने व्याख्या गरेको छ ।
आज (आइतबार) काठमाडौंस्थित नेपाल प्रज्ञाप्रतिष्ठान कमलादीमा दिउँसो २ बजे कार्ल मार्क्स २ सय १ औँ द्विशतवार्षिकी भव्य रुपमा मनाइँदै छ। कार्यक्रममा नेपाल कम्युनिष्ट पार्टी (नेकपा)का अध्यक्ष पुष्पकमल दाहाल प्रचण्ड, पूर्वप्रधानमन्त्री एवम् नेकपाका नेताद्वय माधवकुमार नेपाल, झलनाथ खनाल, कार्ल मार्क्स द्विशतवार्षिकी समारोह समिति संयोजक धनश्याम भूषाल उपसंयोजक रामकार्की लगायतले सम्बोधन गर्नेछन् ।
