२६ चैत्र, विराटनगर । मोरङबाट ब्राउनसुगरसहित २ जना पक्राउ परेका छन । बेलबारी नगरपालिका वडा नं ३ बाट अवैध लागुऔषध ब्राउनसुगरसहित २ जनालाई प्रहरीले नियन्त्रणमा लिएको जिल्ला प्रहरी कार्यालय मोरङले पत्रकार सम्मेलनको आयोजना गरि सार्वजनिक गरेको छ ।
लकडाउनको समयमा एक स्थानमा धेरैजना भेला हुन नसक्ने भएकाले भिडियो मार्फत अनलाईन प्रेस मिटको आयोजना गरी पक्राउ परेका दुई जनालाई प्रहरीले सार्वजनिक गरेको हो ।
मंगलबार बेलबारी नगरपालिका ३ पूर्वपश्चिम राजमार्ग इलाका प्रहरी कार्यालयबाट खटिएको प्रहरी टोलीले सोहीस्थानमा पूर्वबाट पश्चिमतर्फ गइरहेको शंकास्पद दुईजना सवार प्रदेश नं २–००१ प २६७२ नम्बरको मोटरसाइकल रोकी चेकजाँच गर्दा दुई जना ब्राउनसुगरसहित पक्राउ परेका हुन ।
प्रहरीले चालक सिरहा, मिर्चैया नगरपालिका वडा नं ५ का २७ वर्षीय सन्तोष सिंह र मोटरसाइकलमा पछाडी सवार सोही स्थान बस्ने वर्ष २४ का विजय मण्डलको खानतलासी गर्दा उक्त सामान बरामद गरेको हो ।
खानतलासी गर्दा बिजयको दाहिने खुट्टामा लगाएको जुत्ताको मोजाभित्र लुकाई राखेको ३१ ग्राम ६९ मिलि ग्राम लागुऔषध ब्राउन सुगर प्रहरीले फेला पारेको छ । उनीहरुकोसाथबाट मोटरसाइकल सहित नगद २५ सय पनि बरामद भएको छ ।
दुवैलाई प्रहरीले नियन्त्रणमा लिइ थप अनुशन्धान भईरहेको जनाएको छ ।
