२८ चैत, काठमाडौं । सर्वोच्च अदालतले आज शुक्रबार देखि नै न्यायालयका कामकारवाहीहरुलाई बढाउने निर्णय गरेको छ । प्रधानन्यायाधीश चोलेन्द्रशमशेर जवरासहित सर्वोच्च अदालतको शुक्रबार बसेको फूल कोर्ट (पूर्ण बैठक)ले आजदेखि नै न्यायालयका काम कारवाही बढाएको हो ।
यही चैत १२ गते देखि हिजो बिहीबारसम्म न्यायालयले बन्दीप्रत्यक्षीकरणको निवेदन, गम्भीर प्रकृतिको कोभिड—१९ संग सम्बन्धित विषयका रिट निवेदनको दर्ता र सुनुवाई, पक्राउ अनुमति, जरुरी पक्राउ पूर्जीको समर्थ, मुलुकी फौजदारी कार्य्विधि संहिता, २०७४ को दफा १५५ बमोजिमको रकम तिरी र्कदबाट मुक्त हुन सक्ने निवेदनलगायत निवेदनको बारेमा मात्र कारवाही गरेको थियो ।
यस बाहेक आज शुक्रबार देखि अभियुक्तलाई हिरासतमा राख्न अनुमति दिने(म्याद थप गर्ने), अभियोगपत्र दर्ता गर्ने, पक्राउ परी आएका अभियुक्तको बयान लिने, थुनछेक आदेश गर्ने जस्ता कार्यहरु गर्ने गरी फूलकोर्टले निर्णय गरेको छ ।
फूलकोर्टले आइतबारदेखि मुलुकी फौजदारी संहिता, २०७४ को दफा ७३ बमोजिमका निवेदनको कारवाही र सुनुवाई तथा न्याय प्रशासन ऐन, २०७३ को दफा ११ बमोजिम दर्ता भइसकेका पुनरावलोकनका निवेदनका सुनुवाई सम्बन्धी कार्य र लकडाउनको अवधिमा दरपीठ आदेश उपरको निवेदन दर्ता पनि सुचारु हुने निर्णय गरेको सर्वोच्च अदालतबाट थाहा भएको छ ।
सबै प्रकारको व्यवस्था गर्नको समय लाग्ने भएका कारण लकडाउनको अवधि समाप्त भएको तीन दिन पछि अदालतका सबै कार्यहरु नियमित हुने पनि फूलकोर्टले निर्णय गरेको छ ।
