११ वैशाख, काठमाडौं । राष्ट्रिय परीक्षा बोर्डले चैत र वैशाख महिनामा स्थगित भएको कक्षा १० र १२ को परीक्षा सञ्चालन गर्ने तयारी गरिरहेको अवस्थामा विभिन्न सरोकारवाला निकायले पूर्णरूपमा सवारीसाधन सञ्चालन भएर सामान्य जीवन नचलेसम्म परीक्षा लिन नहुने सुझाएका छन् ।
बोर्डले परीक्षाको तालिका, मोडालिटी र हालको अवस्थाबारे जानकारी दिन बुधबार बोलाएको बैठकमा आधा दर्जन निकायले तत्काल परीक्षा लिन अवस्था नभएको बताएका थिए ।
बोर्डका अध्यक्ष प्राडा चन्द्रमणि पौडेलले बोलाएको बैठकमा शिक्षक महासंघ, प्याब्सन, एनप्याब्सन, हिसान, हिस्टान, प्याब्सन काठमाडौंलगायतका उच्च अधिकारीको सहभागिता रहेको थियो ।
बैठकमा अधिकांशले अवस्था सामान्य नभई परीक्षा लिन नहुने बताएका थिए । शिक्षक महासंघका अध्यक्ष बाबुराम थापाले तत्काल कक्षा १० को परीक्षाका बारेमा चिन्ता भएको बताउँदै कक्षा १२ र ११ को परीक्षा केही महिना ढिलो हुँदा पनि समस्या नपर्ने बताएका थिए ।
विश्वव्यापी महामारीका रूपमा फैलिएको र नेपालमा समेत भित्रिएको कोरोनाको प्रभाव कम नभएसम्म र सरकारले जारी गरेको लकडाउन खुकुलो नभएसम्म परीक्षा लिन सम्भव नभएको बताएका थिए । विश्वका करिब ४४ मुलुकको परीक्षा बोर्डको अवस्था हेर्दा कतिले तत्कालका लागि स्थगित गरेको र कतिले अनलाइन माध्यमबाट परीक्षा लिने तयारी गरिरहेको अवस्थामा नेपालमा हतार गर्नुपर्ने अवस्था नभएको बताएका थिए ।
सो अवसरमा बोर्डका अध्यक्ष पौडेलले कोरोेना फैलिएपछि विश्वका विभिन्न मुलुकको परीक्षाको अवस्था, नेपालमा परेको असर, एसईई, कक्षा १२ र ११ को परीक्षा व्यवस्थापनलगायतका बारेमा जानकारी दिएका थिए । उनले सबैको सहमतिको आधार तय भएपछि मात्रै परीक्षा सञ्चालन गर्न उचित हुने बताएका थिए ।
बैठकमा आफ्नो धारणा राख्दै प्याब्सनका महासचिव कुमार घिमिरेले अहिलेको अवस्थामा परीक्षा गर्न नसकिने धारणा राखेका थिए । असारसम्म परीक्षा लिन सक्ने अवस्था नभएको उनको भनाइ थियो ।
उनले स्थगित भएको एसईईको परीक्षाको मोडालिटीको विषयमा पुनः छलफल गर्न आवश्यक रहेको बताएका थिए । होम सेन्टर, स्वमूल्यांकन गर्नेलगायतका विषयमा समेत सोच्नुपर्ने अवस्था आएको बताएका थिए ।
शिक्षा, विज्ञान तथा प्रविधि मन्त्रालयले बोर्डका अध्यक्षको संयोजकत्वमा विज्ञसहितको टोलीले परीक्षा सञ्चालन गर्ने विधिका बारेमा अध्ययन गरिरहेको छ । बैठकमा बोर्डका अध्यक्ष पौडेलले परीक्षाको मोडालिटीका बारेमा समेत छलफल भएको जानकारी गराए ।
बैठकमा एनप्याब्सनका अध्यक्ष ऋतुराज सापकोटा, हिस्टानका अध्यक्ष पुष्प न्यौपाने, हिसानका वरिष्ठ उपाध्यक्ष युवराज शर्मा, बोर्डका सदस्य–सचिव दुर्गा अर्याल, प्याब्सन र एनप्याब्सनका उपत्यकाका प्रतिनिधि परीक्षा नियन्त्रक कृष्णप्रसाद शर्मालगायतको उपस्थिति रहेको थियो ।
