७ जेष्ठ, पर्सा । पर्सामा भारतीय पक्षले दशगजा क्षेत्रमा बनाउन लागेको सुरक्षा पोस्ट सीमाबाट पर सारेको छ । पर्सास्थित ठोरीका बासिन्दाको विरोधपछि दशगजामा बनाउन लागेको सुरक्षा पोष्ट सिमाभन्दा ३० मिटर पर सारेको हो ।
भारतीय पक्षले वन गस्तीका लागि भन्दै सोमबारदेखि ठोरी गाउँपालिका–४ विजयबस्तीस्थित दशगजामै टावरसहितको सुरक्षा पोस्ट बनाउन थालेको थियो । गिट्टी, बालुवा झारेर निर्माण कार्यसमेत थालेको भारतीय पक्षलाई स्थानीयले रोकेका थिए ।
मंगलबार दशगजामै सुरक्षा पोस्ट बनाउन भारतीय सुरक्षा फौज एसएसबी, बिहार प्रहरी र भारतीय वन विभागका अधिकारी समेत आएका थिए । करिब २ सय ५० को संख्यामा भेला भएका स्थानीय, नेपाल तथा सशस्त्र प्रहरीसमेतको संयुक्त विरोध र अडानपछि भारतीय पक्ष आफ्नै भूमिमा सुरक्षा पोस्ट निर्माण गर्न सहमत भएको हो ।
सशस्त्र प्रहरी बल सुवर्णपुर बीओपीका प्रमुख सशस्त्र प्रहरी निरीक्षक सिंहवीर मल्लले भारतीय पक्षले भ्यु टावरसहितको सुरक्षा पोस्ट निर्माण गर्न खोज्दा विवाद भएको बताएका छन् ।
