१५ जेष्ठ, धनगढी ।
सुदूरपश्चिम प्रदेशमा कोरोना संक्रमितको संख्या २० पुगेको सामाजिक विकास मन्त्री कृष्णराज सुवेदीले जानकारी दिएका छन् ।
प्रदेशसभाको छैटौँ अधिवेशनको तेस्रो बैठकमा सुदूरपश्चिममा बुधबार थप तीन जनामा कोरोना पुष्टि भई संक्रमितको संख्या २० पुगेको मन्त्री सुबेदीले जानकारी दिए । कोरोना भाइरसको नियन्त्रणका लागि प्रदेश सरकारले गरेको गतिविधिको बारेमा जानकारी गराउँदै मन्त्री सुवेदीले बुधवार नयाँ सक्रमित मध्ये दुईजनाको टीकापुर र एकजना दार्चुला अस्पतालमा उपचार भइरहेको बताए ।
जेठ १३ गते मात्रै कैलालीको जानकी गाउँपालिकाका ३८ वर्षीय पुरुष र अछामको मेल्लेख गाउँपालिकाकी ११ वर्षीय बालिका गरी सुदूरपश्चिममा थप दुईजनामा कोरोना पुष्टि भएको थियो । अछामकी संक्रमित बालिका जेठ ८ गते आफ्ना बुवासँगै गौरीफन्टा नाका भएर धनगढी भित्रिएकी थिइन् ।
उनका बुवामा पनि आइतबार कोरोना संक्रमण पुष्टि भइसकेको छ । उनको सेती अस्पतालमा उपचार भइरहेको छ । कैलालीका संक्रमित पनि भारतबाट आएका थिए ।
