Nepal Times
Nepal Times
3
Shares

अमेरिका र दक्षिण कोरियाले आक्रमण गर्न लागेः उत्तर कोरिया

अमेरिका र दक्षिण कोरियाले आक्रमण गर्न लागेः उत्तर कोरिया

२१ फागुन, एजेन्सी ।
उत्तर कोरियाले छिमेकी दक्षिण कोरिया र अमेरिका मिलेर आफूमाथि आक्रमण गर्ने योजना बनाएको आरोप लगाएको छ । अमेरिका र दक्षिण कोरियाले आगामी १३ देखि २३ मार्चसम्म १० दिन लामो युद्ध अभ्यास गर्न लागेका छन् । यसको पूर्वसन्ध्यामा उत्तरले त्यस्तो आशंका गरेको हो । उसले दुई देशबीच हुन लागेको संयुक्त सैन्य अभ्यास रोकिनुपर्ने माग गरेको छ ।

उत्तरले विगत देखिनै यसको विरोध गर्दै आएको थियो । साथै चुनौतीका लागि उसले छोटो तथा लामा दुरीका र अमेरिकासम्म मार हान्न सक्ने अन्तरमहादेशिय क्षेप्यास्त्रहरुको पनि परिक्षण गर्दै आएको छ । उत्तरले विशेष दिनका अवसर पारेर आफ्ना हतियार तथा सैन्य शक्तिको पनि प्रदर्शन गर्दै आएको छ ।

यसबीच उत्तरले संयुक्त राष्ट्रसंघले नै यो सैन्य अभ्यासलाई रोक्न प्रभावकारी कदम चाल्नुपर्ने भन्दै विज्ञप्ति निकालेको छ । आइतबार उत्तरको सरकारी सञ्चारमाध्यमसँग कुरा गर्दै त्यहाँका उपविदेशमन्त्री किम सन ग्योङले उक्त सैन्य अभ्यासले सो क्षेत्रमा तनाव बढाउने र अवस्थालाई खतरनाक तहसम्म धकेल्ने चेतावनी दिएका छन् ।

‘राष्ट्रसंघले अमेरिका र दक्षिण कोरियालाई संयुक्त सैन्य अभ्यास तुरुन्तै रोक्न लगाउनुपर्छ साथै हामीबारे उनीहरूले गरेका उत्तेजक टिप्पणी बन्द गर्न पनि कडा रूपमा आग्रह गर्नुपर्छ,’ उपविदेशमन्त्री ग्योङले राष्ट्रसंघलाई सम्बोधन गर्दै भनेका छन् । हालको युद्ध अभ्यास उत्तर कोरियामाथिको आक्रमणको योजनाअन्तर्गत पर्ने पनि उनले दाबी गरेका छन् ।

आफूलाई आक्रमण गरेर कब्जा गर्नको लागि अमेरिका र दक्षिण कोरियाले तयारी गरिरहेको उत्तर कोरियाली विश्लेषण भइरहँदा अमेरिकाले भने ती भनाइहरू स्वीकार गरेको छैन । अमेरिका र दक्षिण कोरियाले उत्तर कोरियाली ब्यालिस्टिक र आणविक कार्यक्रमको खतराको बदलामा आफूहरूले युद्ध अभ्यास गर्न लागेको बताएका छन् ।

आफूहरू उत्तर कोरियाको खतरा नभएर उत्तर कोरिया आफ्नोसँगै विश्वको खतरा भएको उनीहरूको भनाइ छ । शनिबार मात्र उत्तरले पनि जवाफमा भनेको थियो– अमेरिकी आक्रमकताको अचुक उपाय भनेको उत्तर कोरियाको आणविक हतियार नै हो ।

उत्तर कोरियाले अमेरिकासँगको सन्तुलन कायम राख्न यस्ता हतियार अपरिहार्य रहेको बताउने गर्दछ । उत्तरका सर्वोच्च नेता किम जोङ उनले बारम्बार आफ्नो क्षेप्यास्त्र परीक्षणमा संयुक्त राष्ट्रसंघ असन्तुलित र पूर्वाग्रही रहँदै आएको पनि आरोप लगाउने गर्दछन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.