२ चैत, एजेन्सी ।
आसिफ खान र भृत्य अरविन्दको विस्फोटक ब्याटिङसँगै यूएईले घरेलु टोली नेपाललाई कीर्तमानी ३११ रनको विशाल लक्ष्य दिएको छ । आईसीसी क्रिकेट विश्वकप लिग टूको अन्तिम खेलमा टस जितेर ब्याटिङ रोजेको यूएईले ५० ओभरमा ६ विकेट गुमाएर ३१० रन बनायो ।
१९ रनमा पहिलो विकेट गुमाएको यूएईका लागि महम्मद वसिम र भृत्य अरविन्दले ७९ रनको साझेदारी गरे । बुधबार मात्र पपुवा न्यूगिनीविरुद्ध शतक बनाएका बसिमलाई १६.२ ओभरमा व्यक्तिगत ६३ रनमा आउट गरेपछि नेपालले खेलमा फर्किने संकेत दिएको थियो ।
अरविन्दले एउटा एण्ड सम्हालेपछि नेपालले धेरै रन जोड्न दिएको थिएन र विकेट पनि लिएको थियो । पाँचौं विकेटका रुपमा रोहन मुस्तफा २० रनमा आउट हुँदा यूएईको स्कोर ३७.३ ओभरमा १७५ रन थियो । तर अरविन्द र आसिफ खानको जोडीले अन्तिम ६ ओभरमा विस्फोटक ब्याटिङ गर्दै १०२ रन थप्यो ।
आसिफ खानले त छक्का र चौकाको वर्षा नै गरे । ४४ ओभर सकिँदा २० रन बनाएर खेलिरहेका उनले ४१ बलमा १०० रन पूरा गरे । सबभन्दा कम बलमा शतक पूरा गर्ने एशोसिएसट ब्याट्सम्यानको कीर्तिमान बनाएका उनी १०१ रनमा अविजित रहे ।
अरविन्द भने ९४ रन बनाएर अन्तिम बलमा आउट भए । नेपालका लागि दीपेन्द्रसिंह ऐरीले ८ ओभरमा २ मेडनसहित १९ रन खर्चेर २ विकेट लिए। ललितनारायण राजवंशीले १० ओभरमा २७ रन दिँदै १ विकेट हात पारे। सन्दीप लामिछानेले १० ओभरमा ८० रन खर्चेर १ विकेट लिँदा सोमपाल कामीले ९ ओभरमा १ मेडनसहित ७४ रन खर्चेर १ विकेट नै झारे।
गुलशन झाले ८ ओभरमा बिनाविकेट ६३ रन खर्चिदा कुशल मल्लले पनि ४ ओभरमा बिनाविकेट ३८ रन दिए। आजको खेलमा बलर करण केसी र ज्ञानेन्द्र मल्ललाई बेन्चमा राखिएको छ । करण लिग २ मा सन्दीप लामिछानेपछि नेपालका लागि सर्वाधिक विकेट लिने बलर हुन् ।
करणले लिग २ मा अहिलेसम्म ३१ खेलमा ५० विकेट लिएका छन् । आजको खेलमा करणको स्थानमा गुल्सन झालाई टिममा स्थान दिइएको छ । यसैगरि, नेपालका अनुभवि ब्याट्सम्यान ज्ञानेन्द्र मल्ले पनि लिग २ को अन्तिम म्याच गुमाएका छन् ।
ज्ञानेन्द्रलाई अघिल्ला दुई खेलमा पनि टिममा समावेश गरिएको थिएन । आज खेलमा जित निकालेको खण्डमा नेपाल नामिबियालाई पछि पार्दै तेस्रो स्थानमा रहेर लिग टू अन्त्य गर्दै जिम्बावेको टिकट काट्नेछ । यदी आजको खेलमा पराजित भएमा नेपालले विश्वकप छनोट खेल्न प्लेअफको माध्यमबाट जानुपर्ने हुन्छ ।
