६ चैत , एजेन्सी ।
अन्तर्राष्ट्रिय अपराध अदालत (आईसीसी) ले रुसी राष्ट्रपति भ्यादिमिर पुटिनविरुद्ध पक्राउ पूर्जी जारी गरेको विषयमा चीनले आक्रोश पोखेको छ । आईसीसीले युक्रेनबाट बालबालिकालाई अवैध रूपमा रुस पठाउने लगायतका युद्ध अपराधका लागि उनी जिम्मेवार रहेको आरोप लगाउँदै पक्राउ पूर्जी जारी गरेको हो ।
तर यसमा चीनले आपत्ति जनाउँदै सोमबार एक विज्ञप्ती निकालेको छ । जसमा उसले आईसीसीलाई डबल स्टान्डर्ड कायम गरेको भन्दै आरोप लगाएको छ । चीनले आईसीसीलाई दोहोरो मानकबाट बच्न र देशका प्रमुखहरुको प्रतिरक्षाको सम्मान गर्नका लागि सुझाव पनि दिएको छ ।
चिनियाँ विदेश मन्त्रालयका प्रवक्ता वाङ वेनविनले आईसीसीसंग राजनीतिकरण र डबल स्ट्यान्डर्ड नदेखाउन आग्रह गर्दै व्रिफिङमा भने, अदालतले एउटा उद्येश्य र निष्पक्षपन कायम राख्नु पर्छ, र अन्तर्राष्ट्रिय कानूनअन्तर्गत अधिकार क्षेत्र अनुसार राष्ट्रध्यक्षहरुको प्रतिरक्षालाई सम्मान गर्नु पर्छ ।
यता युक्रेनसहित पश्चिमी देश र अमेरिकाले भने आईसीसीको फैसलाको स्वागत गरेका छन् । रुसले भने आईसीसीले जारी गरेको पक्राउ पूर्जीलाई ट्वाइलेट पेपर भनेको छ । रुसीले यसलाई मान्ने छैनन् भन्दै रुसी अधिकारीहरुले रुस आईसीसीको सदस्य नरहेको प्रतिक्रिया दिएका छन् ।
यसैबीच चिनियाँ राष्ट्रपति सी जिनपिङ रुसको राजधानी मस्को पुगेका छन् । आजबाट सुरु भएको तीन दिने राजकीय भ्रमणमा उनी रुस पुगेका हुन् । रुसी सरकारी मिडिया आरटीका अनुसार आजै सी र पुटिनले रात्रिभोज गर्नेछन् भने सीको भ्रमणका दौरान दुई देशका आर्थिक, रणनीतिक तथा युक्रेन युद्धको बारेमा छलफल हुनेछन् ।
दुई शीर्ष नेताको निर्णायक छलफल मंगलबार हुनेछ । रुस र युक्रेन युद्धको तनावको दौरानमा सीको रुस भ्रमणलाई अन्तर्राष्ट्रिय रूपमा महत्त्वका साथ हेरिएको छ। राष्ट्रपति भएपछिको पहिलो अन्तर्राष्ट्रिय भ्रमण रुसबाटै सुरु गरेका सीले चिनियाँ कम्युनिष्ट पार्टीको तेस्रो कार्यकालको महासचिव भएपछि पनि पहिको अन्तर्राष्ट्रिय भ्रमण रुसबाटै थालेका छन् ।
सी चीन पुग्नु अगाडि पुटिनले चिनियाँ र सीले रुसी मिडियामा दुई देशको ‘सीमारहित’ सम्बन्ध बारेमा आलेख लेखेका थिए । अन्तर्राष्ट्रिय न्यायालयले शुक्रबार पुटिनलाई मानवतावादविरुद्धको अपराध गरेको भन्दै पक्राउ पूर्जी जारी गरेकै दिन सीको रुस भ्रमणको औपचारिक घोषणा भएको थियो।
पुटिनले अन्तर्राष्ट्रिय न्यायालयको फैसला आएको भोलिपल्ट क्रिमिया र पर्सापल्ट डोनबास क्षेत्र भ्रमण गरेका थिए । अहिले सीको मस्को भ्रमणको ठीक अघि पुटिनको समर्थनमा आईसीसीविरुद्ध चीनले बयान जारी गरेको हो । यसलाई चीनको कुटनीतिकै हिस्सा मानिएको छ ।
