चितवनमा रविलाई जित नारायणले चुनौती दिने

१६ चैत, काठमाण्डौ ।
वैशाख १० मा हुने उपनिर्वाचनको मिति नजिकिदै गर्दा दलहरुले उम्मेदवार छनोट गर्न सुरु परेका छन् । उपनिर्वाचन हुने तीन स्थानमा अहिलेसम्म केही दलले उम्मेदवारी घोषणा गरिसकेका छन् । नेपाली कांग्रेसले आज मात्रै उम्मेदवार टुंग्याएको छ । कांग्रेसले तनहुँ १ मा गोविन्द भट्टराईलाई उम्मेदवार बनाउने निर्णय गरेको छ ।

पार्टी कार्यालय सानेपामा बसेको कार्यसम्पादन समितिको बैठकले केन्द्रीय सदस्य समेत रहेको भट्टराईलाई उम्मेदवार बनाउने निर्णय गरेको नेता अर्जुन नरसिंह केसीले बताए । तनहुँ १ बाट निर्वाचन रामचन्द्र पौडेल राष्ट्रपति बनेपछि त्यहाँ उपनिर्वाचन हुँदै छ। यस्तै, कांग्रेसले बारा २ मा जसपालाई सघाउने निर्णय गरेको छ। त्यहाँ जसपा अध्यक्ष उपेन्द्र यादव चुनाव लड्ने चर्चा छ।

यस्तै कांग्रेसले चितवन २ मा जितनारायण श्रेष्ठलाई उम्मेदवार बनाउने निर्णय गरेको छ। उनी चितवन कांग्रेसका पूर्व सभापति हुन् । यसरी हेर्दा राष्ट्रिय स्वतन्त्र पार्टीका सभापति रवि लामिछानेको प्रतिस्पर्धी जितनारायण श्रेष्ठ बन्ने भएको छन्।

यद्यपि चितवन २ बाटै यसअघि विजयी भएपनि सर्वाेच्च अदालतको फैसलापछि सांसद पद गुमाएका रविले फेरि चितवनबाट उम्मेदवारी दिनेबारे औपचारिक घोषणा भने गरिसकेका छैनन् । उता कांग्रेसका श्रेष्ठ भने सत्तारुढ दलबाट साझा उम्मेदवार बन्न सक्नेछन् ।

चितवनमा नेकपा एमालेले भने अहिलेसम्म उम्मेदवारको टुंगो लगाइसकेको छैन् । चितवनमा आफू उम्मेदवार बन्ने भएसँगै श्रेष्ठले पार्टी कार्यालय सानेपामा सञ्चारकर्मीहरूसँग कुरा गर्दै मंसिरमा आएको हावाहुरीले अहिले काम नगर्ने प्रतिक्रिया दिएका छन् ।

उनले रवि लामिछानेलाई लक्षित गर्दै भनेका छन्, ‘मंसिरमा भएको निर्वाचन चितवनमा हावाहुरी आएको थियो। जे हावाहुरी आएको थियो त्यो मान्छे अहिले जनताको बीचमा आफ्नो स्थिति खोज्दै कहाँ हो मेरो पहिचान भनेर खोज्नुपर्ने परिस्थिति बनेको छ।

अहिले कहिले कसलाई समर्थन गरेको छ। कहिले कसलाई भोट हालेको छ। भोट हालेको कारण पनि खुलाउनु पर्दैन। किन सरकारलाई समर्थन गरेको र विश्वासको मत दिएको जनतालाई भन्नु पनि नपर्ने। पार्टीबाट निर्णय गर्नु पनि नपर्ने। चितवनको नागरिक सचेत छन्।

’ बारा २ मा जसपाबाट उपेन्द्र यादव उम्मेदवार बन्ने योजनामा छन् भने जनमत पार्टीले यसअघि रामसहाय प्रसादसँग पराजय भोगेका माओवादीका नेता शिवचन्द्रलाई पार्टीमा प्रवेश गराई उम्मेदवार बनाउने घोषणा गरिसकेको छ । यस्तै लोसपाबाट राजेन्द्र महतो पनि बारामा उम्मेदवारी दिने तयारीमा छन् । एमालेले भने बारामा पनि अहिलेसम्म निर्णय गरिसकेको छैन् ।