१८ जेठ, काठमाण्डौ ।
आफ्नो तेस्रो प्रधानमन्त्रीत्वकाल स्मरणदायी र प्रतिफलमुखी बनाउने लक्ष्य बोकेका प्रधानमन्त्री प्रचण्ड दुई छिमेकीलाई रिझाउन पनि त्यतिनै प्रयासरत रहेका छन् ।
गत महिना मात्रै भारतको ४ दिने औपचारिक भ्रमण गरी आफ्नो भ्रमणलाई ऐतिहासिक भ्रमण भएको दावी गर्दै आएका प्रचण्ड अब उत्तरी छिमेकी चीनको भ्रमणमा जाने भएका छन् ।
प्रधानमन्त्री बनेलगत्तै आफ्नो पहिलो भ्रमण भारत हुने बताएका प्रचण्ड यही अनुशार भारतको भ्रमण गरेपछि अब आगामी भदौ महिनामा उत्तरी छिमेकी चीनको भ्रमणमा जाने भएका छन्। कैलालीको धनगढीमा सोमबार परराष्ट्रमन्त्री एनपी साउदले प्रधानमन्त्रीको चीन भ्रमणबारे जानकारी दिएका हुन्।
साउदका अनुसार आगामी सेप्टेम्बर अर्थात् भदौ महिनामा चीन भ्रमणमा जाने गरी प्रधानमन्त्रीको कार्यक्रम तयार भइरहेको छ। ‘प्रधानमन्त्रीजीको चीन भ्रमण पनि हुँदैछ। सेप्टेम्बरमा प्रधानमन्त्रीको आसन्न चीन भ्रमणका क्रममा केही उपलब्धि हुनेछ’, उनले भने, ‘उत्तरतिर चीन आर्थिक र राजनीतिक रुपमा पनि उदाएको छ।
चीनको विकासको छलाङलाई नेपालमा पनि उपयोग गर्न सक्नुपर्छ।’ साउदले अहिले पनि नेपालले भारतसँग दुईतिहाइ व्यापार गरिरहेको बताएका छन्। ‘सामाजिक र सांस्कृतिक सम्बन्ध पनि छ। पारवहनका लागि चीन र तेस्रो मुलुकबाट हुने व्यापार हिन्द महासागरबाट हुन्छ’, उनले भने, ‘चीन र भारतको उदाउँदो अर्थतन्त्रबाट लाभ लिन सक्छौँ।’
उनले दल विशेषको परराष्ट्र नीति र नेता विषेशको सम्बन्ध भएर नहुने बताउँदै अब सबैलाई स्वीकार्ने परराष्ट्रनीति बनाउने पनि जानकारी दिए। ‘विगतमा केही कमीकमजोरी भएका छन्। अहिले हामी त्यसलाई सच्याएर जाँदैछौँ। सबै दललाई स्वीकार्य हुने परराष्ट्र नीति बनाउँदैछौँ’, उनले भनेका छन् ।
गत जेठ १७ देखि २१ सम्म भएको प्रधानमन्त्रीको भारत भ्रमणमा पनि केही ठूला उपलब्धि भएको उनले दाबी गरे। उनले आफू सोमबारै अजरबैजान जान लागेको पनि बताए। हिजो मात्रै उपप्रधान तथा गृहमन्त्री नारायणकाजी श्रेष्ठ आफ्नो ५ दिने चीन भ्रमण पूरा गरी स्वदेश फर्किएका छन् ।
चीन भ्रमण फलदायी भएको भन्दै श्रेष्ठले क्रममा दुई देशबीच व्यापार, लगानी, पर्यटन, ‘कनेक्टिभिटी’ लगायत विषयमा छलफल भएको र चीन सरकात्मक रहेको बताएका छन् । उनले चीन सरकारसँग सम्झौता भएको बीआरआईको कार्यान्वयनको विषयमा चीन सरकारले चासो राखेको पनि बताएका छन् ।
भ्रमणका क्रममा उपप्रधानमन्त्री श्रेष्ठ र चीनका उपप्रधानमन्त्री ह लि फङबीच द्विपक्षीय भेटवार्ता भएको थियो । अब प्रधानमन्त्रीको भ्रमणमा पनि चीनले बीआरआईको कार्यान्वयनलाई जोड दिनेछ । तर नेपालको दक्षिणी छिमेकी भारत भने नेपालमा बीआरआई कार्यान्वयनको विपक्षमा देखिदै आएको छ ।
