१९ साउन, एजेन्सी ।
पेरिस ओलम्पिकअन्तर्गत पुरुष फुटबलको सेमिफाइनल समीकरण पुरा भएको छ । शुक्रबार राति भएका क्वाटरफाइनलका खेलहरूबाट अन्तिम ४ टिमको तय भएको हो । सेमीफाइनल पुग्ने चार टोलीमा मोरक्को, स्पेन फ्रान्स र इजिप्ट रहेका छन् । यसक्रममा अर्जेन्टिनालाई १–० गोलअन्तरले पराजित गर्दै घरेलु टोली फ्रान्स सेमिफाइनलमा प्रवेश गरेको हो ।
फ्रान्सको जितमा माटेटा जिन–फिलिपले गरेको गोल नै निर्णायक बन्यो । फिलिपले खेलको पाँचौँ मिनेटमा गोल गर्दै फ्रान्सलाई सुरुवाती अग्रता दिलाएका थिए । त्यही गोल नै फ्रान्सका लागि निर्णायक बन्यो । खेलको अन्त्यतिर फ्रान्स र अर्जेन्टिनाका खेलाडीहरूबीच विवाद भएको थियो । विवाद बढ्दै गएपछि खेलाडीहरूबीच हात हालाहालको स्थिति सिर्जना भएको थियो ।
दुवै टोलीका खेलाडी र प्रशिक्षकहरु मैदानमा नै भिड्न पुगेका थिए । पछिल्लो समय दुई टोलबीच तनाव बढ्दो छ । गत १४ जुलाईमा कोपा अमेरिका जितेपछि अजेन्टिनी खेलाडीहरुले फ्रान्सका अश्वेत खेलाडीविरुद्ध रंगभेदी गीत गाउको भिडियो सार्वजनिक भएको थियो । खेलको सुरुवातमा नै अजेन्टीनाको राष्ट्रिय गान बज्दा फ्रान्सका समर्थकहरुले त्यसविरुद्ध हुटिंग गरेका थिए ।
खेलपछि दुई टोलीबीच हात हालहालको स्थिति बन्यो । यसबीच जितसँगै सेमिफाइनल प्रवेश गरेको फ्रान्सले फाइनल प्रवेशका लागि इजिप्टको सामना गर्नेछ । इजिप्ट पाराग्वेलाई पेनाल्टी सुटआउटमा ५–४ गोलअन्तरले पराजित गर्दै सेमिफाइनल पुगेको हो । इजिप्टका लागि सुटआउटमा पाँचै खेलाडीले गोल गरेका थिए । पाराग्वेका पेरेज गोल गर्न असफल रहे ।
निर्धारित समयम १–१ को बराबरीमा सकिएपछि खेल पेनाल्टीसुटआउटमा पुगेको थियो । फ्रान्सले पछिल्लोपटक सन १९८४ मा ओलम्पिकमा स्वर्ण पदक जितेको थियो । उता सन् १९३६ मा इटालीपछि विश्वकप र ओलम्पिक जित्ने पहिलो टोली बन्ने अर्जेन्टिनाको सपना भने चकनाचुर बनेको छ । यसैगरी स्पेन र मोरक्को पनि सेमिफाइनल प्रवेश गरेका छन् ।
स्पेनले जापानलाई ३–० ले हरायो । स्पेनका लागि फर्मिन लोपेजले दुई तथा अबेल रुइजले एक गोल गरे । अर्को क्वाटरफाइनलमा मोरक्को अमेरिकालाई ४–० ले हरायो । मोरक्कोका लागि साउफिएन राहिमी, इलिस अखोमाच, अच्रफ हाकिमी र एल मेहदी माउहाउबले एक–एक गोल गरे । यससंगै सेमिफाइनल समीकरण पुरा भएको हो । अब फाइनल प्रवेशका लागि फ्रान्सले इजिप्टको सामना गर्ने छ भने स्पेन र मोरक्को भिड्ने छन ्। सेमिफाइनल खेल सोमबार राति हुने छ ।
