८ भदौ, विराटनगर ।
भारतीय क्रिकेट टोलीका पूर्वकप्तान विराट कोहलीको जर्सी ४० लाख भारु अर्थात् नेपालको ६४ लाख रुपैयाँमा बिक्री भएको छ । शुक्रबार मुम्बईमा भएको च्यारिटी अक्सनबाट कोहलीको जर्सी महँगो दाममा बिक्री भएको हो ।
अल्पसंख्यक बालबालिकालाई गुणस्तरीय शिक्षा उपलब्ध गराउने लक्ष्यका साथ खटिएको भिप्ला फाउन्डेसनलाई सहयोग गर्न क्रिकेटर केएल राहुल र उनकी पत्नी अथिया शेट्टीले ‘क्रिकेट फर च्यारिटी’ कार्यक्रमको आयोजना गरेका थिए ।
उक्त अक्सनमा धेरै ठुला अन्तर्राष्ट्रिय खेलाडीहरूले अक्सनका लागि आफ्नो संग्रह सहयोग गरेका थिए । उक्त च्यारिटी अक्सनबाट कप्तान रोहित शर्माले हस्ताक्षर गरेको ब्याट २४ लाख भारुमा बिक्री भएको थियो भने विराटकै ग्ल्भ्स पनि २८ लाख भारुमा बिक्री भएको थियो ।
भारतीय पूर्वकप्तान महेन्द्रसिंह धोनीको ब्याट पनि १३ लाख भारुमा बिक्री भएको थियो भने राहुल द्रविडको ब्याट ११ लाख भारुमा बिक्री भएको थियो । यस च्यारिटी अक्सनबाट एक करोड ९३ लाख भारु रुपैयाँ संकलन भएको छ ।
भारतीय अभिनेता सुनील शेट्टीकी छोरी अभिनेत्री अथिया शेट्टी र क्रिकेटर राहुल केही समययता भिप्ला फाउन्डेसन मिलेर सामाजिक कामतर्फ अग्रसर भइरहेका छन् । गत वर्षको जनवरीमा बिहे गरेका उनीहरूले यसपटक भने च्यारिटी अक्सन राखेर रकम संकलन गरेका हुन्।
