११ चैत , एजेन्सी ।
फिफा विश्वकप २०२२ को साविक उपविजेता समेत रहेको फ्रान्स दोस्रो लेगमा क्रोएसियाविरुद्ध ‘सडन डेथ’मा जित निकाल्दै यूईएफए नेसन्स लिगको सेमिफाइनलमा प्रवेश गरेको छ । आइतबार राति दोस्रो लेगको निर्धारित र अतिरिक्त समयसम्म फ्रान्सले २–० को अग्रता बनाएपछि खेल पेनाल्टी सुटआउटसम्म पुग्यो ।
पहिलो लेगमा क्रोएसियाले घरेलु मैदानमा विश्वकप उपविजेताविरुद्ध २–० कै जित निकालेको थियो । पेनाल्टीमा फ्रान्सका किलियन एमबाप्पे, अरेलिएन चुवामेनी, रान्डाल कोलो मुआनी, डिजायर डोए र डायोट उपामेकानोले गोल गरे ।
फ्रान्सका जुलेस काउन्डे र थियो हर्नान्डेज पेनाल्टीमा असफल बने । पाहुना टिमका निकोला मोरो, मारियो पासालिच, क्रिस्टियन जाकिच र डुज कालेटा–कारले गोल गरे । क्रोएसियाका मार्टिन बटुरिना, फ्रान्जो इभानोभिच र जोसेप स्टानिसिच गोल गर्न असफल रहे ।
त्यसअघि, फ्रान्सलाई दोस्रो लेगको निर्धारित समयसम्म जित दिलाउन माइकल ओलिस र ओस्मान डेम्बेलेले गोल गरेका थिए । यी दुवै गोल दोस्रो हाफमा भएका थिए । फ्रान्सले अब फाइनल प्रवेशका निम्ति युरो च्याम्पियन स्पेनविरुद्ध प्रतिस्पर्धा गर्नेछ ।
स्पेनले आइतबारै भएको अर्को खेलमा नेदरल्यान्ड्सविरुद्ध ‘सडन डेथ’मै जित निकाल्दै अन्तिम–४ को यात्रा तय गरेको छ । आइतबार राति घरेलु मैदानमा स्पेनलाई जित दिलाउन ‘सडन डेथ’मा मिकेल मारिनो, फेरान टोरेस, एलेक्स गार्सिया, एलेक्स बाइना र पेड्रीले गोल गरे ।
स्पेनका युवा फरवार्ड लामिन यमलले भने प्रहारलाई जाली चुमाउन सकेनन् । डच टिमका भर्जिल भान डाइक, टेउन कुम्पमेनर्स, जाभी सिमोन्स र केनेथ टेलरले गोल गरे । पाहुना टिमका नाओ लाङ र डोन्यल मालेन पेनाल्टीमा चुकेका थिए ।
त्यसअघि, १२० मिनेटसम्म पुगेको खेलमा स्पेनबाट मिकेल आयार्जाबालले दुई र लामिन यमलले एक गोल गरेका थिए । नेदरल्यान्ड्सबाट मेम्फिस डिपे, लान माटसेन र जाभी सिमोन्सले गोल गरेका थिए । यी दुई टिमबीचको पहिलो लेग पनि २–२ को बराबरीमा सकिएको थियो ।
उता रोमाञ्चक दोस्रो लेगमा ३–३ को बराबरी खेले पनि इटालीविरुद्ध समग्रमा ५–४ को जित निकाल्दै जर्मनी यूईएफए नेसन्स लिगको सेमिफाइनलमा प्रवेश गरेको छ । आइतबार राति सिग्न इदुना पार्कमा घरेलु टिमका जोसुवा किमिच, जमल मुसियाला र टिम क्लेनडेन्स्टले गोल गरे ।
पाहुना टिमका मोइस किन र जियाकोमो रास्पाडोरीले गोल गरे पनि पहिलो लेगमा व्यहोरेको हारका कारण इटालीलाई अघि बढाउन सकेनन् । यी दुई टिमबीचको पहिलो लेगमा जर्मनीले इटालीलाई उसैको मैदानमा २–१ ले पराजित गरेको थियो ।
आइतबार राति ३–० ले पछि परेको स्थिति उल्ट्याउँदै इटाली खेलमा फर्किएको थियो । जर्मनीका किमिचले ३०औँ मिनेटमा पेनाल्टीमार्फत गोल गरे । ३६औँ मिनेटमा मुसियालाले घरेलु टिमको अग्रता दोब्बर बनाए ।
४५औँ मिनेटमा क्लिेनडेन्स्टले गोल गरेपछि घरेलु टिम पहिलो हाफसम्म ३–० ले अगाडि थियो । दोस्रो हाफमा इटालीले तीन गोल फर्कायो । ४९औँ मिनेटमा किनले पहिलो र ६९औँ मिनेटमा दोस्रो गोल गरे । इन्ज्युरी समयमा रास्पाडोरीले पेनाल्टीमा गोल गर्दै खेलमा फर्कने इटालीको आशा कायम राखेका थिए ।
तर, यसपछि गोल नहुँदा जर्मनी पहिलो लेगको नतिजाका कारण सेमिफाइनलमा प्रवेश गरेको हो । जर्मनीले अब अन्तिम–४ मा पोर्चुगलविरुद्ध प्रतिस्पर्धा गर्नेछ । पोर्चुगलले आइतबारै राति भएको अर्को खेलमा डेनमार्कलाई समग्रमा ५–३ ले हराउँदै सेमिफाइनल यात्रा तय गरेको छ ।
आइतबार राति घरेलु मैदानमा पोर्चुगललाई जित दिलाउन फ्रान्सिस्को ट्रिन्काओले दुई गोल गरे । कप्तान क्रिस्टियानो रोनाल्डो र गोन्कालो रामोसले एक÷एक गोल थपे । पोर्चुगलले अर्को गोल भने आत्मघाती उपहार पाएको थियो ।
पाहुना टिमका रास्मस क्रिस्टेन्सन र क्रिस्टियन एरिकसनले गोल गरे पनि टिमको हार टार्न सकेनन् । योसँगै पोर्चुगलले समग्रमा ५–३ को जित निकाल्दै सेमिफाइन यात्रा तय गरेको हो । पहिलो लेगमा पोर्चुगल डेनमार्कको मैदानमा १–० ले पराजित भएको थियो । पोर्चुगलले अब फाइनल प्रवेशका निम्ति जर्मनीसँग खेल्नेछ ।
