१७ वैशाख , काठमाण्डौ ।
आज बिहानैदेखि कोसी, मधेस, बागमती र गण्डकी प्रदेशसहित देशका हिमाली र पहाडी क्षेत्रमा बादल लागेको छ । यस्तै कोसी, बागमती र गण्डकी प्रदेशका थोरै स्थान र सुदूरपश्चिम प्रदेशका एक–दुई स्थानमा मेघगर्जन÷चट्याङसहित हल्का वर्षा भइरहेको मौसम पूर्वानुमान महाशाखाले जनाएको छ ।
आज दिउँसो देशका तराई भूभागका थोरै स्थानमा हावाहुरीको पनि सम्भावना छ । यस्तै आज राति पनि कोसी, बागमती गण्डकी प्रदेशका हिमाली र पहाडी भूभागका केही स्थान तथा मधेस र कोसी प्रदेशका थोरै स्थान तथा बाँकी तराई भूभागका एक–दुई स्थानमा मेघगर्जन÷चट्याङसहित मध्यमसम्म वर्षा÷हिमपात हुने सम्भावना छ ।
देशका तराई भूभागका केही स्थानमा हावाहुरीको पनि सम्भावना छ । महाशाखाका अनुसार नेपालमा अहिले पश्चिमी र स्थानीय वायुका साथै देशको पूर्वी क्षेत्रनजिक तल्लो वायुमण्डलमा रहेको न्यून चापीय क्षेत्रको पनि प्रभाव छ ।
यसैबिच आज काठमाडौँ उपत्यकामा पनि मध्यमसम्म वर्षा हुने मौसम पूर्वानुमान महाशाखाका मौसमविद् सरोज पुडासैनीले जानकारी दिएका छन् ।
विहान काठमाडौँ उपत्यकामा छिटपुट वर्षा सुरु भइसकेको छ । काठमाडौंसहित देशका विभिन्न स्थानमा आज पनि वर्षा भएको छ । आज दिउँसो पनि धेरै स्थानमा वर्षाको पूर्वानुमान छ । हल्कादेखि मध्यमसम्म वर्षाको सम्भावना रहेको महाशाखाका मौसमविद् सरोज पुडासैनीले बताए । उनका अनुसार साँझतिर सामान्य हावाहुरीसहित वर्षा हुने सम्भावना देखिन्छ ।
अबका तीन दिन अर्थात् बिहीबार, शुक्रबार र शनिबारसम्मै यस्तै खालको मौसमको सम्भावना रहेको उनले बताए । तर, पानी निरन्तर पर्ने हुँदैन । केही बेर पर्ने, रोकिने र फेरि वर्षाको सम्भावना हुन्छ । पानी पार्ने एउटा प्रणालीका कारण हिजो बुधबार देशका धेरै स्थानमा वर्षा भएको थियो ।
त्यो प्रणाली भने देशबाट बाहिरिइसकेको उनले जानकारी दिए । हाल स्थानीय र पश्चिमी वायुको अर्को प्रणालीको प्रभाव रहेको उनले बताए । बुधबार देशैभरिजस्तो पानी परेको थियो । “सुदूरपश्चिममा केही ठाउँमा अलि परेन । नभए देशैभरि हल्कादेखि मध्यम वर्षा भएको छ,” उनले भने ।
अबका तीन दिन वर्षाको पूर्वानुमान गरिए पनि आजको तुलनामा भोलि (शुक्रबार) अलि कम सम्भावना रहेको उनले स्पष्ट पारे । “आज, भोलि र पर्सिको अवस्था हेर्दा पनि त्यस्तैत्यस्तै अवस्था देखिन्छ । यद्यपि, आज, भोलि, पर्सिलाई हिजोभन्दा अलि कम वर्षा हुन्छ,” मौसमविद् पुडासैनीले भने ।
काठमाडौंमा पनि अझै तीन दिन वर्षाको पूर्वानुमान छ । तर, यहाँ पनि पानी निरन्तर पर्ने सम्भावना छैन । “काठमाडौंमा बेलुकापख मध्यमसम्म वर्षासम्म हुन्छ भने दिउँसोलाई छ्यार्र, केही समयको लागि वर्षा हुने सम्भावना देखिन्छ,” उनले भने । काठमाडौंमा आज वर्षाको सम्भावना अन्यत्रको तुलनामा बढी रहेको उनले बताए ।
आज काठमाडौंसहितका धेरै स्थानमा पूर्ण रूपमा घाम लाग्ने सम्भावना नरहेको उनले बताए । देशको पश्चिमी भूभागमा भने घाम लाग्ने सम्भावना रहेको उनले स्पष्ट पारे । गएको शनिबार (वैशाख १२)यता विभिन्न मौसमी प्रणालीका कारण देशका कतिपय स्थानमा दिउँसोजसो पानी परिरहेको छ ।
पर्यावरण एवं मौसमविद् उज्ज्वल उपाध्यायले पनि वर्षाको सम्भावना अझै रहेको उल्लेख गरेका छन् । तर, बुधबारको जस्तो ‘ठूलो’ वर्षाको सम्भावना नरहेको उनको भनाइ छ । उनले निर्माण कार्य र उच्च हिमाली क्षेत्रमा पदयात्राजस्ता गतिविधि आउँदो शनिबार (वैशाख १९)सम्म स्थगन गर्नु बुद्धिमानी हुने जनाएका छन् । निरन्तर पानी पर्ने सम्भावना भने नरहेको उनले स्पष्ट पारेका छन् ।
