२८ फागुन, काठमाण्डौ ।
अमेरिकी राष्ट्रपति डोनाल्ड ट्रम्पले इरानविरुद्धको युद्ध चाडै सकिने दाबी गरिरहेका बेला अमेरिकालाई उल्टै अब इरानको हमलाको डरले सताउन थालेको छ। अमेरिकाको संघीय अनुसन्धान ब्युरो एफबीआईले क्यालिफोर्नियाको प्रहरी विभागलाई चेतावनी दिँदै इरानले अमेरिकाको पश्चिमी तटमा ड्रोन हमला गर्न सक्ने जनाएको छ।
एबीसी न्युजले एफबीआईको अलर्टलाई उद्धृत गर्दै आफ्नो रिपोर्टमा यस खुलासा गरेको छ। अलर्टमा भनिएको छ कि अमेरिकी आक्रमणको बदला स्वरुप इरानले यस्तो हमला गर्न सक्नेछ। यो चेतावनी त्यस्तो समयमा आएको हो जब अमेरिका र इजरायलका आक्रमणपछि मध्यपूर्वमा संघर्ष सुरु भएको छ।
इरानले प्रत्युत्तर स्वरुप इजरायल र सम्पूर्ण मध्यपूर्वमा अमेरिकी ठेगाना लक्षित गरेको छ। अलर्टमा गुप्तचर जानकारी अनुसार इरानले अमेरिकी तट नजिकै एउटा जहाजबाट ड्रोन प्रक्षेपण गर्ने विचार गरेको देखिन्छ। एफबीआइको चेतावनीमा भनिएको छ, “हामीलाई हालैको जानकारी प्राप्त भएको छ कि फेब्रुअरी २०२६ को सुरुवातमा इरान कथित रूपमा अमेरिकी तट नजिकै अनजान जहाजबाट बिना पाइलट एरियल व्हीकल (ड्रोन) प्रयोग गरेर अचानक हमला गर्ने प्रयास गर्दैछ।” यसमा क्यालिफोर्नियाका अनजान लक्ष्य यसको निशानामा छन् ।
अलर्टमा थप भनिएको छ कि हाल यसको सञ्चालन सम्बन्धी विवरणहरू उपलब्ध छैनन्। एफबीआईले जानकारी दिएको छ कि उनीहरूलाई हमलाको समय, तरिका, लक्ष्य र अपराधीको बारेमा कुनै ठोस जानकारी छैन। चेतावनीमा कुन शहर वा स्थानलाई लक्षित गर्न सकिन्छ भन्ने उल्लेख गरिएको छैन।
अमेरिकी राष्ट्रपति डोनाल्ड ट्रम्पले अलर्टमा व्यक्त गरिएका चिन्ताहरूलाई अस्वीकार गरेका छन्। जब उनीसँग सोधियो कि के उनलाई अमेरिकाभित्र इरानको बदला लिने सम्भावित कदमको डर छ, उनले जवाफ दिए, “छैन, मलाई डर छैन।” यसबीच, अलर्ट प्राप्त भएपछि क्यालिफोर्नियाले सुरक्षा कडा गर्दै निगरानी बढाएको छ।
अमेरिका र इजरायलको दुई हप्ते बमबारीको बाबजुद पनि इरानको नेतृत्व अझै मजबूत छ। यसअघि खामेनीको हत्या लगत्तै इरानले अमेरिकालाई उचित जवाफ दिने भन्दै अमेरिकाको मुटुमा प्रहार गर्ने चेतावनी दिएको थियो । अमेरिकी गुप्तचर रिपोर्टले देखाएको छ कि हाल यसको छिटो अन्त्य हुने कुनै संभावना छैन।
जेरूशलम पोस्टले एक अमेरिकी गुप्तचर स्रोतलाई उद्धृत गर्दै लेखेको छ कि इंटेलिजेन्स रिपोर्टहरूले देखाउँछन् कि तेहरानको सरकारमा कुनै खतरा छैन र इरानी जनताको नियन्त्रण अझै कायम छ। यो रिपोर्ट त्यतिबेला आएको हो जब तेलको मूल्यलाई लिएर दबावको बीच अमेरिकी राष्ट्रपति डोनाल्ड ट्रम्पले अमेरिकी अभियान अन्त्य गर्ने संकेत दिएका छन्।
ट्रम्पले दावी गरेका छन् कि अमेरिका युद्ध जितिसकेको छ, तर काम पूरा नभएसम्म अमेरिकी सेना काम जारी राख्नेछ। तर इरानका कट्टरपन्थी नेता मजबुतीका साथ कायम रहेका कारण युद्धको सही अन्त्य पत्ता लगाउन गाह्रो हुन सक्छ।
गुप्तचर रिपोर्टमा जोड दिइएको छ कि २८ फेब्रुअरीमा अमेरिका र इजरायलको आक्रमण सुरु भएताका सुप्रीम लिडर अली खामेनीको मृत्यु भए तापनि इरानी धार्मिक नेता एकजुट बनेका छन्।
इजरायली अधिकारीहरूले पनि बन्द कोठाको वार्तामा स्वीकारेका छन् कि युद्धले आयातुल्लाहको धार्मिक शासन अन्त्य हुने निश्चितता छैन। स्रोतका अनुसार, जमिनमा अवस्था बदलिरहन्छ र इरानभित्र पनि परिस्थिति परिवर्तन हुन सक्छ।
अमेरिका र इजरायलले २८ फेब्रुअरीमा इरानविरुद्ध व्यापक आक्रमण सुरु गरेका थिए।
पहिलो दिनको आक्रमणमा सुप्रीम लिडर अयातुल्लाह अली खामेनीको मृत्यु भयो। खामेनीसहित दर्जनौं वरिष्ठ अधिकारी र इस्लामिक रिभोल्युसनरी गार्ड कोप्र्स का शीर्ष कमाण्डरहरू मारिए। आइआरजीसी इरानको एलीट फोर्स हो, जुन सुप्रीम लिडरको अधीन काम गर्छ र देशको अर्थतन्त्रको ठूलो हिस्सा नियन्त्रण गर्छ।
अमेरिकी गुप्तचर मूल्याङ्कन अनुसार खामेनी र आइआरजीसी कमाण्डरहरूको मृत्यु भए पनि अन्तरिम नेताहरूले देशमा नियन्त्रण कायम राखेका छन्। यस साता सुरुमा मौलवीहरूको समूह, असेंबली अफ एक्सपट्र्सले अली खामेनीको छोरालाई नयाँ सुप्रीम लिडर घोषणा गरेका छन् ।
जसले धार्मिक नेतृत्वको निरन्तरता पुष्टि गर्दछ। अमेरिकी र इजरेली आक्रमणपछि इरानले मध्यपूर्वका खाडी राष्ट्रमा रहेका अमेरिकी बेसहरुलाई निशाना बनाएको छ । यस क्रममा आधा दर्जन अमेरिकी सेना मारिएका छन् भने इजरेलले लेबनानमा हिजबुल्लालाई निशाना बनाउदै हवाइ तथा स्थलगत रुपमा आक्रमण गरेको छ ।
यसको प्रतिकारमा हिजबुल्ला र इरानले इजेलमाथि आक्रमण गरेका छन् । फेब्रुअरी २८ यता अमेरिका र इजरायलले इरानमा गरेको सैन्य आक्रमणमा १ हजार ३ सय भन्दा बढी सर्वसाधारणको मृत्यु भएको छ । अन्य ९ हजार ६ सय ६९ नागरिक स्थलहरू ध्वस्त भएका छन् ।
संयुक्त राष्ट्रसंघका लागि इरानका राजदूत तथा स्थायी प्रतिनिधि अमिर सइद इरावानीले ध्वस्त भएका नागरिक स्थलहरूमा ७ हजार ९ सय ४३ आवासीय घरहरू, १ हजार ६ सय १७ व्यावसायिक र सेवा केन्द्रहरू, ३२ चिकित्सा र औषधि सुविधाहरू, ६५ विद्यालय र शैक्षिक संस्थाहरू, १३ रेड क्रिसेन्ट भवनहरू र धेरै ऊर्जा आपूर्ति सुविधाहरू समावेश छन् ।
पछिल्लो समय युद्धको प्रभाव इन्धन संकटमा रुपमा विश्वभर पर्न थालेको छ । हर्मुजमा पूर्ण नियन्त्रण राख्दै इरानले सो जलमार्गबाट कुनैपनि इन्धनका जहाज अघि बढ्न नदिने घोषणा गरेपछि विश्वभर इन्धनको अभाव देखिएको छ ।
