१४ भदौ , एजेन्सी ।
नयाँ फरम्याटमा हुन लागेको च्याम्पियन्स लिगको ड्र सार्वजनिक भएको छ । गएराति मोनाकोमा भएको हाइ टेक ड्र अनुसार साविक विजेता रियाल मड्रिड र लिभरपुल लिग चरणमा नै आमने सामने हुनेछन् । प्रविधीको उच्च प्रयोग भएको ड्र मा पोर्चुगिच फरवार्ड क्रिस्टियानो रोनाल्डो र इटालिका पूर्व गोलकिपर बुफन सहभागी थिए ।
रियाल र साविक उप विजेता बोरुसिया डर्टमन्डले पनि लिगमा प्रतिस्पर्धा गर्नेछन् । गत सिजनमा रियाल, डर्टमन्डमाथि दुई शून्य गोलको जित हात पार्दै च्याम्पियन भएको थियो । फ्रेन्च च्याम्पियन पेरिस सेन्ट जर्मेन (पिएसजी)ले, जर्मन क्लब बायर्न म्युनिखको सामना गर्नेछ । पिएसजीले एट्लेटिको मड्रिडसँग पनि खेल्नेछ ।
बार्सीलोनाले डर्टमन्ड र बायर्न विरुद्ध मैदान उत्रनु पर्नेछ । म्यानचेस्टर सिटीले पनि लिगमा पिएसजी र युभेन्टसबाट चुनौती पाउनेछ । लिग चरणको खेल तालिका भोलि सार्वजनिक हुनेछ । यो पटकदेखि च्याम्पियन्स लिगमा कुल ३६ टिम सहभागी हुनेछन् । प्रत्येक टिमले चार होम र चार अवे गरी आठ खेल खेल्नेछन् ।
यसले पूरानो फरम्याटको समूह चरणलाई प्रतिस्थापन गरेको छ । शीर्ष आठमा रहने टिम राउन्ड अफ सिक्सटिनमा छनौट हुनेछन् । नौ देखि २४ औं स्थानमा रहने टिमले प्ले अफ खेल्ने अवसर पाउनेछन् । सो भन्दा कम स्थानमा रहने टिम भने युरोपा लिगमा पनि छनौट हुने छैनन् । राउन्ड अफ सिक्सटिनबाट भने च्याम्पियन्स लिग आफ्नो पुरानै फरम्याटमा फर्कनेछ । नयाँ फरम्याटमा प्रतियोगिता गएसँगै खेल संख्या १२५ बाट १८९ पुगेको छ । १७ सेप्टेम्बरबाट शुरु हुने च्याम्पियन्स लिग जनवरी २९ मा सकिने छ ।
