२९ पुष,काठमाण्डौ ।
मुलुक संघीयतामा गएपछि गाउँ गाउँमा सरकार पुगे । सानो कामका लागि सदरमुकाम र संघीय राजधानी धाउनुपर्ने समस्या धेरै हदसम्म न्युनिकरण भएका छन् । नेताहरुले भनेजस्तो सिंहदरबारको सबै अधिकार गाउँगाउँसम्म नपुगेपनि त्यसको सुरुवात भने भइसकेको छ । गाउँमै सरकार आएपछि जे जस्तो भएपनि गाउँमा विकासको मुल फुटेको छ ।
सरकारी योजनाहरुसँगै निजी क्षेत्रहरुबाट समेत गाउँमै संभावना पहिचान गरी लगानी गर्ने क्रम बढेको छ । स्थानीय सरकार आएपछि चहलपहल सँगै पर्यटकीय क्षेत्रहरुको समेत विकास भएको छ । कतै ठाउँको नामअनुसारका स्तम्भ बनाएर अनि कतै दुर्लभ वन्यजन्तुको मूर्ति बनाएर पर्यटकलाई आकर्षित गर्ने गरिएको छ ।
तर मोरङको मिक्लाजुङमा भने पर्यटकलाई आकर्षित गर्न अर्को अनौठो जुक्ति अपनाइएको छ । पछिल्लो समय मिक्लाजुङ्ग वडा नम्बर –३ निसेलुङमा बनेको उल्टो घरका कारण चर्चामा छ । संम्भवतः नेपालमा पहिलोपटक बनेको उल्टो घरले स्थनीयस्तरमा पर्यटकको केन्द्र बनेको छ ।
परैबाट हेर्दा अरु सामान्य घरभन्दा ठिक उल्टो पाराको संरचना रहेको घरले दैनिक सयौँ पर्यटक आकर्षित गरिरहेको छ । घरको छानो भुईँमा, जगको भाग आकाशतिर देखिन्छ । घरभित्र प्रवेश गर्दा पनि शयन कक्ष, शौचालय, भान्सा कोठा सबै उल्टो देखिन्छ । टेबल, दराज, कुर्सीहरू सबै उल्टो छन् ।
मिक्लाजुङ्ग गाउँपालिका फरक हावापानी र भौगोलिक वनावटका कारण पर्यटकीय हिसावले कोशी प्रदेशकै एक उत्कृष्ट गन्तव्य मानिन्छ । केही प्रतिशत भू–भाग पहाडको काखमा रहेको यस पालिकामा खुडी, मिक्लाजुङ्ग डाँडा, चुलीपोखरी, मिक्लुबेतेनी लगायतका ठाउँहरु घुम्न योग्य रहेका छन् ।
अझ पछिल्लो समय संचालनमा आएको निसेलुङ फर्न पार्क अर्काे पर्यटकीय गन्तव्य बनेको छ । यस पार्क भित्र उल्टो घर, फाउन्टेन, भ्यूटावर, पिरतीको गाउँ, बाल उद्यानका सामग्री लगायत निर्माण गरिएको छ । देश तथा विदेशमा पर्यटकीय रुपमा यसको प्राकृतिक सुन्दरतालाई परिचित गराउन यस पार्कको सुरुवात गरेको निसेलुङ फर्न पार्क प्रालिका सञ्चालक इन्द्रमणी भट्टराईले बताएका छन् ।
पार्कका लागि हालसम्म एक करोड खर्च भइसकेको उनले बताएका छन् । उनले ६० लाख खर्च गरेर बनाएको उल्टो घर यसभन्दा अघि थाइल्यान्ड, भारतका केहि स्थानमा निर्माण भइसकेको र आफूहरुले पनि त्यहीबाट साभार गरेर निर्माण गरेको बताएका छन् ।निसेलुङ पर्यटन प्रवर्द्धन समितिका अध्यक्ष खगेन्द्र मादेनका अनुसार यस्तो उल्टो आकर्षक भवन बनाउनका लागि भारतको जलपाइगुढीबाट इन्जिनियर र मिस्त्री ल्याइएको थियो ।
यस पार्कमा रहेको भ्यूटावरबाट उर्लाबारी, लेटाङ, दमक, पथरी शनिश्चरे पालिका, मिक्लाजुङ्गका सम्पूर्ण वडाहरु नियाल्न सकिनेछ । मोरङको उर्लाबारीदेखि मधुमल्ला हुँदै टाँडी पुगेपछि करिब एक किलोमिटर पूर्व लागेपछि सुन्दर निसेलुङ पुग्न सकिने छ ।
