२३ पुष , काठमाण्डौ ।
अमेरिकी राष्ट्रपति डोनाल्ड ट्रम्पले भेनेजुएलामा सैन्य कारबाही गर्दै राष्ट्रपति निकोलस मादुरोलाई त पक्राउ गरेर अमेरिका ल्याए । तर अहिले उनी स्वयं भने डराइरहेका छन् । यसैका कारणले आफूमाथि तेस्रो पटक महाअभियोग लाग्ने हो कि भन्ने डर ट्रम्पलाई छ ।
उनले रिपब्लिकन सांसदहरूलाई आफूले सन् २०२६ को मध्यावधि चुनाव नजिते आफूमाथि महाभियोग लाग्ने दाबी गरेका छन् । विपक्षी डेमोक्र्याटहरूले आफूलाई महाभियोग लगाउने चिन्ता उनले व्यक्त गरेका हुन् ।
ट्रम्पले वाशिंगटनमा आयोजित एक कार्यक्रममा भने, ‘हामीले मध्यावधि चुनाव जित्नुपर्छ किनभने यदि हामीले मध्यावधि चुनाव जितेनौँ भने, यो केवल हुनेछ– मेरो मतलब, तिनीहरूले मलाई महाभियोग लगाउने कारण खोज्नेछन् । मलाई महाभियोग लगाइनेछ।’
ट्रम्पले सांसदहरूलाई मतदाताहरूको आक्रोशलाई बुझेर जीवनयापनको लागत, स्वास्थ्य सेवा र अन्य मुद्दामा आफ्ना नीतिबारे जानकारी गराउन आग्रह गरेका थिए । उनले भने, ‘उनीहरू भन्छन् कि जब तपाईं राष्ट्रपति पद जित्नुहुन्छ, तपाईं मध्यावधि हार्नुहुन्छ। म चाहन्छु कि तपाईंले मलाई जनताको दिमागमा के भइरहेको छ भनेर व्याख्या गर्न सक्नुहुन्छ।’
ट्रम्पले रिपब्लिकनहरूलाई स्वास्थ्य सेवामा डेमोक्र्याटहरूको सन्देशलाई बलियोसँग जवाफ दिन र लचिलो हुन सल्लाह दिए । सो अवसरमा उनले पार्टीभित्रका मतभेदप्रति गुनासो पनि गरेका थिए ।
अमेरिकामा सन् २००६ देखि हरेक बहालवाला राष्ट्रपतिले मध्यावधिमा सदनको नियन्त्रण गुमाउँदै आएका छन् । ट्रम्प अमेरिकी इतिहासमा दुई पटक महाभियोग लगाइएका एक मात्र राष्ट्रपति हुन् ।
तर दुवै पटक सिनेटबाट उनलाई दोषी ठहर गरिएन । पहिलो पटक सन् २०१९ मा शक्तिको दुरुपयोग र कांग्रेसको काममा अवरोध पु¥याएको आरोपमा उनीमाथि महाभियोग लगाइएको थियो।
दोस्रो पटक सन् २०२१ मा क्यापिटल हिलमा भएको आक्रमणलाई प्रोत्साहन दिएको (राजद्रोहको उक्साहट) आरोपमा महाभियोग लगाइएको थियो । दुवै अवस्थामा हाउस अफ रिप्रिजेन्टेटिभ्सले महाभियोग पारित गरे पनि माथिल्लो सदन सिनेटमा आवश्यक दुई–तिहाइ बहुमत नपुगेकाले उनलाई पदबाट हटाउन सकिएको थिएन् ।
अमेरिकामा राष्ट्रपतिलाई पदबाट हटाउन त्यति सजिलो छैन । तर पनि ट्रम्पलाई डरले सताइरहेको हो । मिडटर्म चुनाव हारेपनि ट्रम्पले तत्कालै पदबाट हट्नु पर्दैन । तर यसले कंग्रेसमा रिपब्लिकन पार्टीको पकडलाई कमजोर बनाउन सक्छ ।
जसले गर्दा राष्ट्रपतिलाई कानून ल्याउन र ठूला निर्णय लिन अप्ठ्यारो पर्ने छ । यदी प्रतिनिधि सभामा डेमोक्रेट्सले बहुमत ल्याए उनीहरुले महाभियोगको प्रक्रिया शुरू गर्ने अधिकार पनि प्राप्त गर्नेछन् ।जसलाई लिएर नै ट्रम्पको धड्कन बढेको हो ।
अमेरिकामा मिडटर्म चुनाव राष्ट्रपतिको चार वर्षको कार्यकालको बीचमा हुने गरेको छ । यो चुनाव नोभेम्बर महिनमा हुन्छ। मिडटर्म चुनावमा प्रतिनिधि सभाका सबै ४३५ सिटहरुमा मतदान हुन्छ, उता सीनेटको भने लगभग एक–तिहाई सिटमा चुनाव हुन्छ ।
मिडटर्म चुनावमा ३४ राज्यहरुमा राज्यपालहरुको पनि चुनाव हुन्छ । केही राज्यहरुमा दुई दुई कार्यकाल हुने राज्यपाल पनि चुनिन्छन् । साथै राज्य विधानसभाहरु र स्थानीय निकायहरु जस्तो मेयर र नगर परिषदको चुनाव पनि हुन्छ । यसैकारण मिडटर्म चुनावलाई अमेरिकामा सत्ताको एउटा ठुलो राजनीतिक परीक्षा मानिन्छ ।
