८ वैशाख ,काठमाण्डौ।
ट्वान्टी २० अन्तर्राष्ट्रिय शृङ्खला जोगाउन जित्नै पर्ने दबाबका बीच नेपालले आज दोस्रो तथा अन्तिम ट्वान्टी २० खेलमा युएईसँग खेल्दैछ । नेपालले काठमाडौंमा रहेको टियु क्रिकेट रंगशालामा युएईसँग बेलुका ५ बजे पछि खेल्दैछ । शङ्खलाको पहिलो खेलमा सोमबार नेपाल युएईसँग ६ विकेटले पराजित भएको थियो ।
वर्षाले प्रभावित खेलमा १० ओभरमा पाएको ७८ रनको लक्ष्य युएईले ८.५ ओभरमा ४ विकेट गुमाएर पूरा गरेको थियो । २ खेलको शृङ्खलामा बराबरी गरी शृङ्खला जोगाउन नेपाललाई जितको विकल्प रहेको छैन । युएई पनि जितका साथ शृङ्खला जित्ने लक्ष्यमा रहेको छ । नेपालका लागि हिजोको खेलमा पेस बलर हेमन्त धामीले टी–२०आई डेब्यू गरे ।
आजको खेलमा सन्तोष यादवले पनि डेब्यू पाउने सम्भावना छ । कप्तानसहित केही अनुभवी र नियमित खेलाडी पनि टी–२०आई टोलीबाट हटाएपछिको नयाँ स्वरुपको टोली पहिलो खेलमा भने सफल हुन सकेन । यस्तै यूएईको टोलीमा पनि भारतबाट बसाइ सरेर मापदण्ड पूरा गरेका केही नयाँ खेलाडीहरू समावेश भएका छन् । यस्तै नेपालमा पहिलोपटक रातको समयमा अन्तर्राष्ट्रिय खेल भएको हो ।
यसबीच अब आज कीर्तिपुरस्थित त्रिवि क्रिकेट मैदानमा नेपाल ‘गर या मर’ को अवस्थामा उत्रिन लागेको हो । यो खेलमा घरेलु टोलीलाई जितबाहेक अर्को विकल्प छैन। पहिलो खेलको हारले नेपाललाई दबाबमा परेको हो । आजको खेल नेपालका लागि बराबरीका लागि मात्र होइन, आत्मविश्वास फर्काउने अवसर पनि हो ।
घरेलु मैदानमा समर्थकको साथ पाउँदा पनि प्रदर्शन सुधार्नु चुनौतीकै विषय बनेको छ । पहिलो खेलमा टस जितेर पहिला ब्याटिङ गर्ने निर्णय गरेको नेपालले १८.५ ओभरमा ८ विकेट गुमाउँदै १२२ रन बनाएको थियो । नेपालका कप्तान दीपेन्द्रसिंह ऐरीले अविजित रहँदै सर्वाधिक ३२ रन बनाए ।
उनले ३५ बलमा चौका ३ प्रहार गरे । उनले यसै खेलमार्फत कप्तानीमा डेब्यु गरेका छन् । यसअघि उनी टोलीका उपकप्तान थिए । तर, मुख्य प्रशिक्षक स्टुअर्ट लले नियमित कप्तान रोहितकुमार पौडेललाई आराम दिएपछि कप्तानी जिम्मेवारी ऐरीले पाएका हुन् ।
उता युएई पहिलो खेलको जितलाई निरन्तरता दिँदै सिरिज जित्ने योजनामा छ । यो टोली आत्मविश्वासका साथ मैदान उत्रनेछन् । यसले नेपालका लागि चुनौती अझ कठिन बनाउने पक्का छ । नेपालको टी–२०आई टोलीमा दीपेन्द्रसिंह ऐरीसहित कुशल भुर्तेल, कुशल मल्ल, सन्दीप जोरा, आरिफ शेख, बसिर अहमद, गुलशन झा, लोकेस बम, सन्दीप लामिछाने, नन्दन यादव, सन्तोष यादव, अर्जुन साउद, हेमन्त धामी, साहब आलम, शेर मल्ल रहेका छन् ।
नेपाल क्रिकेट सङ्घ (क्यान) ले यसअघि टी–२० शृङ्खलाका लागि दीपेन्द्रसिंह ऐरी र लिग–टु शृङ्खलाका लागि रोहित पौडेलको कप्तानीमा १५ सदस्यीय टोली घोषणा गरेको थियो । नेपाल, युएई र ओमान सम्मिलित लिग–टु वैशाख १२ देखि २२ गतेसम्म हुनेछ ।
