२३ असोज, काठमाडौं ।
प्रधानमन्त्री केपी शर्मा ओलीले जनताले रोग र भोकले ज्यान गुमाउनु नपरोस् भनेर सरकारले काम गरिरहेको बताएका छन्। आज एनआरएनको विश्व ज्ञान सम्मेलनलाई सम्बोधन गर्दै उनले जनताको जीवनरक्षाका निम्ति सरकार प्रयासरत रहेको बताए।
प्रधानमन्त्रीले भने–‘रोग र भोकले नेपालीले ज्यान गुमाउनु नपरोस् भनेर, जनताको जीवन सुरक्षित गर्नु नै सबैभन्दा महत्त्वपूर्ण कुरा हो भनेर मैले सुरु देखि नै अभिव्यक्ति दिँदै आएको छुु । त्यसका निम्ति मेरो नेतृत्वको सरकारले पूर्ण रुपमा प्रयास पनि गरेको छ।’
उनले कोभिड–१९ को विश्वव्यव्यापी महामारीको असर नेपालमा पनि परेको र अहिलेसम्म यो बढिरहेको बताउँदै नियन्त्रणका प्रयासहरु जारी उल्लेख गरे। यतिबेला नेपाल सरकारको काममध्ये प्रमुख काम कोभिड नियन्त्रणको लागि प्रयास गर्नु, कोभिडका विरुद्ध लड्नु, जनतालाई सुरक्षित राख्ने भएको प्रधानमन्त्रीको भनाइ छ।
उनले कोरोना संक्रमणले आर्थिक वृद्धिदरमा गम्भीर धक्का दिएको बताए । नेपालको आर्थिक वृद्धिदर शून्यमा भने नपुगिसकेको बताउँदै उनले विकसित देशको तुलनामा नेपालको वृद्धिदरमा कमि नआएकोे बताए।
