७ कार्तिक, सुर्खेत ।
मुख्यमन्त्रीसमेत रहेका नेकपा कर्णाली प्रदेश संसदीय दलका नेता महेन्द्रबहादुर शाहीविरुद्ध पेस भएको अविश्वासको प्रस्ताव अस्वीकृत भएको छ ।
दलको शुक्रबार बसेको बैठकले बहुमतको आधारमा प्रस्ताव अस्वीकृत गरेको सचेतक कुर्मराज शाहीले बताए । उनीविरुद्ध अविश्वासको प्रस्ताव दर्ता गर्नेहरुको अनुपस्थितिमा गरिएको बैठकमा उपस्थित उनीपक्षीय सांसदहरुले शाहीविरुद्ध प्रस्तावको विपक्षमा मत दिएका हुन् ।
मुख्यमन्त्री शाहीले गुलाबजंग शाहलाई निलम्बन गरि प्रमुख सचेतक बनाएका सीता नेपालीले डाकेको संसदीय दलको बैठकमा उपस्थित १९ सांसदले शाहीविरुद्धको अविश्वासको प्रस्तावमा मत दिएका हुन् ।
शुक्रबार बिहान ११ बजे बसेको प्रदेश नेकपा संसदीय दलको बैठकमा अविश्वासको प्रस्तावको विपक्षमा पूर्व माओवादीका ११ र पूर्वएमालेका (नेता माधव नेपाल पक्षीय) ८ जना सांसद उभिएका हुन् ।
बैठकमा अविश्वासको प्रस्ताव दर्ता गर्ने ओली पक्षीय ११ जना सांसद भने भने बैठकमा अनुपस्थित रहेको बताइएको छ ।
संसदीय दलको बैठक बस्नुअघि नेकपा अध्यक्ष एवं प्रधानमन्त्री केपी ओलीले मुख्यमन्त्री शाहीलाई आफ्ना पक्षका गुलावजंग शाहीलाई प्रमुख सचेतकबाट निलम्बन गर्ने निर्णय फिर्ता लिनका लागि लिखित निर्देशन दिएका थिए ।
‘अनुशासित तबरले प्रमुख सचेतकको जिम्मेवारी सम्हालिरहनु भएको र मुख्यमन्त्रीबिरुद्ध अविश्वासको प्रस्तावमा हस्ताक्षर गर्न असहमत रहनु भएका नेपाल कम्युनिष्ट पार्टीका नेता, प्रदेशसभा दल कर्णालीका प्रमुख सचेतक श्री गुलावजंग शाहमाथि तपाईले गरेको कारवाही फिर्ता लिन र उहाँलाई पूर्ववत प्रमुख सचेतकको जिम्मेवारीमा स्थापित गर्न निर्देशित गर्दछु’ ओलीले पठाएको पत्रमा उल्लेख छ ।
मुख्यमन्त्री शाहीबिरुद्ध असोज २५ गते ओली पक्षका ८, नेपाल पक्षका ७ र पूर्वमाओवादी केन्द्र पृष्ठभूमिका ३ जना सांसदले अविश्वासको प्रस्ताव दर्ता गरेका थिए ।
तर नेकपाको केन्द्रीय समीकरणमा ओली एकातिर र दाहाल–नेपाल अर्कातिर भएकाले सोही समीकरण अनुसार प्रदेशमा पनि शाहीको पद जोगाउने र नेपाल पक्षीय सांसदहरुलाई मन्त्री बनाउने सहमति बनेको छ ।
