९ कात्तिक, काठमाडौँ ।
लुम्बिनी प्रदेशका मुख्यमन्त्री तथा नेकपा स्थायी कमिटी सदस्य शंकर पोखरेलले ‘रअ’ प्रमुख भारतीय प्रधानमन्त्री नरेन्द्र मोदीको सन्देशवाहकका रुपमा नेपाल आएको बताएका छन्।
शनिबार सामाजिक सञ्जाल फेसबुकमा लेख्दै पोखरेलले भारतीय प्रधानमन्त्रीको सन्देश लिएर रअ प्रमुखले प्रधानमन्त्री केपी ओलीलाई भेटेको खुलासा गरेका हुन्।
पोखरेलले भनेका छन्– ‘भारतीय प्रधानमन्त्रीको सन्देश वाहकका रुपमा रअ’ का प्रमुख नेपाल आएर नेपालका प्रधानमन्त्रीलाई भेटे । यता नेपाली प्रधानमन्त्रीको विरोध सुरु भो ।’
आफ्नै मुलुकको प्रधानमन्त्रीको विचार र काममा भरोसा गर्न आग्रह गर्दै भनेका छन् – ‘विरोधको योजना हो या नियती ? वुझ्न गाह्रो भो । आफ्नै मुलुकको प्रधानमन्त्रीको विचार र काममा भरोसा गरौ ।’ नेपाल र भारतबीचको सीमा समस्याको परिणाम सुखद होस् भन्दै पोखरेलले कामना गरेका छन् ।
प्रधानमन्त्री ओलीले रअ प्रमुख सामन्तकुमार गोयललाई भेटेको सार्वजनिक भएपछि सर्वत्र विरोध भइरहेको छ । आफ्नै पार्टीका नेताहरुले पनि यसको विरोध गरेका छन् ।
