१५ कात्तिक, एजेन्सी ।
इन्डियन प्रिमियर लिग (आईपीएल)मा साविक विजेता मुम्बई इन्डियन्स क्वालिफायरमा पुगेको छ । शनिबार साँझ दुबई इन्टरनेशल क्रिकेट स्टेडियममा सम्पन्न खेलमा दिल्ली क्यापिटल्सलाई ९ विकेटले हराउँदै मुम्बईले क्वालिफायरमा आफ्नो स्थान पक्का गराएको हो ।
जितका लागि १ सय ११ रनको सामान्य लक्ष्य पछ्याएको मुम्बईले १४।२ ओभरमा १ विकेटको क्षतिमा पूरा गर्यो । मुम्बईको सानदार जितमा ओपनर ईशान किशन ४७ बलमा ८ चौका र ३ छक्का सहित ७२ रनमा अविजित रहे । सूर्यकुमार यादव ११ बलमा १ छक्का सहित १२ रनमा अविजित रहे । नोर्कियालाई छक्का प्रहार गर्दै किशनले मुम्बईलाई जित दिलाएका थिए ।
मुम्बईका ओपनर किशन र क्विन्टन डी ककले १०।२ ओभरमा ६८ रनको साझेदारी गर्दै सहज जित नजिक पुर्याएका थिए । एनरिच नोर्कियाले बोल्ड आउट गुर्नअघि डी ककले २८ बलमा २ चौका सहित २६ रनको योगदान दिए ।
त्यसअघि टस हारेर ब्याटिङको निम्तो पाएको दिल्लीले २० ओभरमा ९ विकेटको क्षतिमा १ सय १० रन बनाएको थियो । दिल्लीका कुनैपनि ब्याट्सम्यानले राम्रो प्रर्दशन गर्न सकेनन् । दिल्लीले पहिलो ओभरको तेस्रो बलमा ओपनर शिखर धवनलाई शून्यमा गुमाएको थियो । धवन ट्रेन्ट बोल्टको बलमा सूर्यकुमार यादवबाट क्याच आउट हुन पुगेका थिए ।
बोल्टलेनै तेस्रो ओभरको अन्तिम बलमा अर्का ओपनर पृथ्वी शालाई १० रनमा विकेटकिपर क्विन्टन डी ककबाट क्याच आउट गराउँदै दोस्रो सफलता दिलाए । स्पिनर राहुल चहरको ११ औं ओभरको दोस्रो बलमा कप्तान श्रेयस ऐर २५ रनमा स्टम्पिङ आउट भए । ऐरले २९ बलमा १ चौका र १ छक्का प्रहार गरे ।
१२ औं ओभरको पहिलो बलमा जस्प्रित बुमराहले मार्कस स्टोइनिसलाई २ रनमा डी ककबाट क्याच आउट गराए । दुई बलपछि ऋषभ पन्त २१ रनमा एलबिडब्लू आउट हुँदा दिल्ली ६२–५ को कमजोर अवस्थामा पुगेको थियो । पन्तले २४ बलमा २ चौका प्रहार गरे । बुमराहलेनै १४ औं ओभरको अन्तिम बलमा हर्षल पटेललाई ५ रनमा एलबिडब्लू आउट गरे ।
नाथन कुल्टर नाइलको १६ औं ओभरको दोस्रो बलमा ठूलो सट खेलेका शिम्रन हेटमायर क्रुनाल पान्ड्याबाट ११ रनमा क्याच आउट भएपछि दिल्लीबाट ठूलो योगफलको सम्भावना टाढिएको थियो ।
तल्लोक्रममा रविचन्द्रन आश्विन १२, कागिसो रबाडा १२ र प्रविन दुबेले ७ रन जोडे । मुम्बईका जस्प्रित बुमराहले ४ ओभरमा १७ रन खर्चेर ३ विकेट लिए । ट्रेन्ट बोल्टले ४ ओभरमा २१ रन खर्चेर ३ विकेट लिए । नाथन कुल्टर नाइल र राहुल चहरको नाममा एक एक विकेट रह्यो ।
मुम्बईले आफ्नो लिग चरणको अन्तिम खेल मंगलबार सनराइजर्स हैदराबादविरुद्ध खेल्नेछ भने दिल्लीले अन्तिम खेल सोमवार रोयल च्यालेन्जर्स बेंगलोरसँग खेल्ने छ । दिल्लीलाई प्ले अफमा पुग्न बेंगलोरविरुद्ध जित्नै पर्ने हुन्छ । दिल्लीको यो लगातार चौथो हार हो । अन्तिम खेलमा पराजित भएमा नेट रनरेटमा निर्भर रहनुपर्ने हुन्छ । शीर्षस्थानको मुम्बईको यो जितसँगै क्वालिफायरमा स्थान पक्का बनेको हो ।
