२६ कात्तिक, काठमाडाैँ ।
प्रधानमन्त्री केपी शर्मा ओलीले आफु रहरले प्रधानमन्त्री नभई जनताले बनाएको बताएका छन् । जनचाहना अनुसार आफुले सरकारको नेतृत्व गरिरहेकोले कसैले राजिनामा दिन लगाउनु जनचाहना विपरीत रहेको दावी गरे।
पार्टीभित्रको विवाद उत्कर्षमा पुगिरहेका बेला बुधबार संखुवासभाको किमाथांका नाका पुगेका ओलीले यस्तो अभिव्यक्ति दिएका हुन् । उनले आफूले कुनै पनि हालतमा राजीनामा नदिने पनि बताएका छन् ।
‘जनताले आवश्यक ठानेर प्रधानमन्त्री बनाएको हो, कोही कसैले राजिनामा माग्नु ब्यर्थ हो’, प्रम ओलीले भने । उपचारको क्रममा आफैले डाक्टरसँग डिस्चार्ज मागेको ३ दिनपछि काममा लागेको बताउँदै आफु सधै देश विकासमा चिन्तित रहेको बताए । पछिल्लो समय पार्टी फुटको हल्ला चलाईएकोले त्यस्ता कुराको विश्वास नगर्न ओलीले आग्रह गरे ।
५० ववर्ष अघिदेखि टुटेफुटेको पार्टी मिलाउँदै अहिले यहाँसम्म पुगेको प्रधानमन्त्री तथा नेकपाका अध्यक्ष ओलीले बताए ।
प्रधानमन्त्री ओलीले जोगवनी-खाँदबारी-किमाथांका सडक चीन, भारत र नेपाललाई जोड्न देशकै महत्वपुर्ण बाटो रहेको बताउँदै राज्यको प्राथमिकतामा रहेको बताए। सडक खण्डको पहरा छिचोल्न नेपाली सेनालाई जिम्मा दिईसकिएको र सडक ट्रयाक ओपन भएपछि कालो पत्रेसम्मको काम क्रमस हुने गरिने बताए । सडक निर्माणपछि किमाथाङ्का निक्कै नजिक हुने प्रधानमन्त्री ओलीले दावी गरे ।
अनुगमनमा भौतिक पुर्वाधार तथा यातायात मन्त्री वसन्त नेम्वाङ र प्रदेश १ का मुख्यमन्त्री शेरधन राईको पनि उपस्थिति थियो ।
