२३ मंसिर, काठमाडौं । सुनको भाउ आज एकैदिन प्रतितोला १५ सय रुपैयाँले बढेको छ । सुनको भाउ आज तोलामा १५ सय रुपैयाँले बढेर ९४ हजार एक सय रुपैयाँमा कारोबार भइरहेको छ ।
गएको साउन २३ गते सुनको भाउ अहिलेसम्मकै उच्च एक लाख ३ हजार ५ सय रुपैयाँ पुगेको थियो । त्यसपछि उतारचढाव आउँदै एक हप्ता अघि सुनको भाउ तोलामा ९० हजार रुपैयाँमा झरेको थियो ।
गएको सोमबार ९० हजार रुपैयाँमा झरेको सुनको भाउ त्यसपछि फेरि उकालो लाग्न थालेको छ ।
विश्वमा कोरोना भाइरसको खोप विकास भएको र अमेरिकी राष्ट्रपतिमा जो बाइडेन विजयी भएपछि सुनको भाउ घट्ने अनुमान गरिएको थियो । तर, त्यसका बाबजुत पनि भाउ बढेको छ ।
नेपाल सुनचाँदी व्यवसायी महासंघका पूर्व अध्यक्ष तेजरत्न शाक्यका अनुसार अहिले सुनको भाउ यसै बढ्यो भन्ने कुनै पनि ठोस कारण छैन ।
