५ पुष, काठमाडौं । सरकारले संवैधानिक निकायहरुमा रिक्त रहेका ४५ पदमा नियुक्तिका लागि गरिएका सफारिस संसद्मा दर्ता गराएको छ ।
मंसिर ३० गते बसेको संवैधानिक परिषदको बैठकले अख्तियारसहित सबै आयोगहरुमा रिक्त पदमा पूर्तिका लागि सिफारिस गरेको हो । यस अघि प्रधानमन्त्री ओली र सभापति देउवाबीच संवैधानिक निकायमा रिक्त पदपूर्तिका लागि पटक पटक छलफल भएको थियो । सरकारले मंसिर २९ गते संवैधानिक परिषद् सम्बन्धि अध्यादेश जारी गरेको थियो । राष्ट्रपतिले जारी गरेको संवैधानिक परिषद्सम्बन्धी अध्यादेशमा ६ सदस्यीय संवैधानिक परिषद् बैठकमा ३ जना उपस्थित भएर २ जनाले सिफारिस गर्ने सक्ने प्रावधान राखिएको थियो । लगत्तै ३० गतेको बैठकले सिफारिसको निर्णय लिएको हो । अख्तियार प्रमुखमा प्रेमकुमार राईसहित आयुक्तमा जयबहादुर चन्द र किशोरकुमार सिलवाललाई सिफारिस गरिएको छ । कांग्रेस सभापति देउवाले नाम उपलब्ध गराएका पुर्व आईजिपी जय बहादुर चन्द पनि अख्तियारमा आयुक्त भएका छन । निर्वाचन आयोगको आयुक्तमा वरिष्ठ अधिवक्ता रामप्रसाद भण्डारी र डाक्टर जानकी तुलाधरलाई नियुक्त गरिएको छ । राष्ट्रिय मानव अधिकार आयोगको अध्यक्षमा तपबहादुर मगर सदस्यमा मनोज दवाडी, डा सूर्य ढुङ्गेल, लिली बस्नेत थापा, मिन ठाकुर, राष्ट्रिय प्राकृतिक स्रोत तथा वित्त आयोगको सदस्यमा जुद्ध गुरुङ, अमरराज मिश्रलाई, महिला आयोगको अध्यक्षमा कमलाकुमारी पराजुली, सदस्यमा कृष्णकुमारी पौडेल खतिवडा र विद्याकुमारी सुनारलाई सिफारिस गरिएको छ । यस्तै दलित आयोगको अध्यक्षमा देवराज बिक, सदस्यमा मिना शोब, परशुराम रम्तेल, कुञ्ज बराइली, मेहेने पार्थीलाई सिफारिस गरिएको छ । समावेशी आयोगको अध्यक्षमा मानप्रसाद खत्री, सदस्यमा रामकृष्ण तिमिल्सिना, हरिदत्त जोशी,यस्तै आदिवासी जनजाती आयोगको अध्यक्षमा रामबहादुर थापा, सदस्यमा मिनश्रीस मगर, मिनचुङ लामा, रिमा राना, शरण राईलाई सिफारिस गरिएको छ । यता मधेशी आयोगको सदस्यमा जीवत्व साह, रेणुदेवी साह, विजय गुप्ता सिफारिस गरिएको छ । यस्तै थारु आयोगको सदस्यमा विकास चौधरी, बबिता चौधरी, सुबोध सिंह र भोलाराम चौधरी, मुस्लिम आयोगको सदस्यमा मोहम्मदिन अलि, मिर्जा अरसद बेगको नाम सिफारिस गरिएको छ । प्रतिनिधिसभा राष्ट्रपतिले विघटन गरिसकेकाले संसदीय सुनवाइ हुन सक्दैन । संसदीय सुनुवाइ नभएको खण्डमा राष्ट्रपतिले नियुक्त गरेको ४५ दिनमा स्वतः नियुक्त हुने प्रावधान छ ।
