११ पुस, काठमाडौं ।
नेपाल कम्युनिष्ट पार्टी (नेकपा) विभाजित भएपछि चीनले विशेष चासो बढेको देखिएको छ ।
राजनीतिक रुपमा नेकपा विभजित भइसकेपछि चीनका कम्युनिस्ट पार्टीको विदेश विभागका उपमन्त्री गुओ यहु आइतबार नेपाल आउन लागेका हुन् । बेइजिङबाट प्रस्थान गरेको चार सदस्यीय टोली छङ्तुको बाटो हुँदै आइतबार मध्यान्हतिर काठमाडौं उत्रिने कार्यक्रम छ ।
नेपाल भ्रमणको क्रममा यहुको टोलीले प्रधानमन्त्री केपी शर्मा ओली, नेकपाको प्रचण्ड-नेपाल समूहका अध्यक्षद्वय पुष्पकमल दाहाल प्रचण्ड र माधवकुमार नेपाललगायतका नेताहरुलाई भेट्ने कार्यक्रम रहेको बताइएको छ । यो टोलीले नेकपाको दुवै समूहलाई भेटेर एकता पुनःस्थापित गर्ने प्रयास गर्ने बुझिएको छ ।
यस अघि नेपालका लागि चिनियाँ राजदुत होउ यान्छीले नेकपाका नेताहरुलाई भेट गरेकी थिइन् । यान्छीले यस अघि नेकपाका अध्यक्षद्वय प्रचण्ड, नेपाल, बर्षामान पुन, कृष्णबहादुर महरासँग भेट गरेकी थिइन् । सबै भेटमा छलफल नेकपा विभाजनपछिको राजनीतिक भविष्यबारे केन्द्रित रहेको थियो ।
राजदूत यान्छीले नेकपा एकता पुनःस्थापित गर्ने प्रयास असफल भएपछि चीनबाट उच्च तहको भ्रमण हुने भएको हाे ।
