१२ पौष, काठमाडौं । जनता समाजवादी पार्टी नेपालका संघीय परिषद अध्यक्ष पूर्वप्रधानमन्त्री बाबुराम भट्टराईले प्रधानमन्त्री केपी शर्मा ओलीले चुनाव घोषणाको नाटक गरेर मन्त्रिपरिषद विस्तार गरेको बताएका छन् ।
चुनाव घोषणा गरेपछि मन्त्रिपरिषद विस्तार गर्न नैतिक रूपमा नमिल्ने पनि उनले बताए ।
‘प्रधानमन्त्री ओलीले संसदमाथि प्रहार गरे, यो त्यतिकै रोकिनेवाला छैन। विभिन्न निकायमा उनले खल्तीबाट मानिस राखेका छन्,’ काठमाडौंमा आज जसपाले गरेको प्रदर्शनपछि कोणसभामा बोल्दै उनले भने, ‘चुनाव घोषणाको नाटक गर्ने अनि मन्त्रिपरिषद विस्तार गर्ने? यस्तो गर्न प्रधानमन्त्रीले मिल्छ?’
उनले आफू प्रधानमन्त्री भएका बेला १२ वटा मन्त्रालय खाली रहे पनि ९ महिनासम्म मन्त्री नबनाएको बताए।
‘म प्रधानमन्त्री हुँदा १२ मन्त्रालय खाली थियो। मैले ९ महिनासम्म कुनै मन्त्री थपिनँ, रेकर्डमा हेर्नुस्. यो नैतिकताले मिल्दैन,’ भट्टराईले भने।
प्रधानमन्त्री ओलीले सडकबाट टिपेर मन्त्रीहरू बनाइरहेको भन्दै भट्टराईले विरोध गरेका छन्। ‘सडकबाट टिपेर मन्त्री बनाउने? प्रधानमन्त्री ओलीमा कति दम्भ छ भन्ने यसबाट देखिन्छ,’ उनले भने।
उनले दुई वर्ष बाँकी हुँदा अहिले किन चुनाव गर्ने भन्ने पनि प्रश्न गरेका छन्।
‘दुई वर्ष बाँकी छँदै अहिले चुनाव गर्ने बेला हो? कोरोना महामारी छ,’ उनले भने।
संसदमा बहुमत हुँदाहुँदै प्रधानमन्त्री ओलीले प्रतिनिधि सभा विघटन गरेको उनले बताएका छन्। ओली पहिलेदेखि नै गणतन्त्र, संघीयताविरोधी रहेको उनले बताए।
‘कम्युनिष्ट भन्ने अनि अयोध्या बनाउने? सुकुम्बासीको घर छैन,’ उनले भने, ‘यस्तो मानिसलाई हामीले प्रधानमन्त्री बनायौं यही गल्ती भयो।’
उनले प्रमुख प्रतिपक्षी नेपाली कांग्रेसलाई सडक संघर्षमा उत्रन पनि आग्रह गरेका छन्। अदालतलाई सुनाउन पनि संघर्ष गर्नुपर्ने उनको भनाइ छ।
‘अदालतको झिनो भरमात्रै छ। अदालतलाई सुनाउन यस्ता विरोध कार्यक्रम गर्नुपर्छ,’ उनले भने। पुष्पकमल दाहाल ’प्रचण्ड’ हिजोआज सडकमा पलेँटी कसेर बस्न थालेको पनि भट्टराईको भनाइ छ।
‘प्रचण्ड बल्ल जिल्ल परेर सडकमा पलेँटी कस्नुभयो। पहिले हामी चुनाव चिन्ह लिन बस्यौं अहिले उहाँ बस्नुभएको छ। योबाट हामी खुसी भने छैनौं,’ उनले भने।
प्रतिनिधि सभा सुचारू गर्न अहिले पनि सकिने भट्टराईले बताएका छन्। सडक संघर्षबाटै प्रतिनिधि सभा पुनर्स्थापना गर्न सकिने उनले बताए।
