१७ पुष, काठमाडौं । नेपाल कम्युनिष्ट पार्टी (नेकपा) राजनीतिक रुपमा विभाजनपछि केहिसमय पूर्वमाओवादी रामबहादुर थापा र पूर्व एमाले बामदेव गौतम कुनैपनि गुटको पक्षमा देखिएनन् । उनीहरु पर्ख र हेरको रुपमा बसिरहे ।
केपी शर्मा ओली र पुष्पकमल दाहाल प्रचण्ड–माधवकुमार नेपाल दुवैका गुटमा सहभागी नभई तटस्थ देखिएका यि दुई नेता मध्ये गृहमन्त्री समेत रहेका थापा मन्त्री बचाउदै ओली समूहमा लागे । तर नेकपा उपाध्यक्ष गौतम भने अहिलेसम्म तटस्थ नै रहेको बताउँदै आएका छन् । संसद विघटन गर्ने प्रधानमन्त्री ओलीको कदमको विरोध गरेपनि नेकपा विभाजन हुन नहुने पक्षमा उनले मत राख्दै आएका छन् । देखिएका नेताहरुमध्ये कित्ता क्लियर नगरी उनले नयाँ पार्टी नै खोल्न लागेका हुन् कि भन्ने चर्चा समेत चलेको थियो । राष्ट्रिय सभाको हिउँदे अधिवेशनको पहिलो वैठकमा जानुपूर्व शुक्रबार विहान नेता गौतमले प्रचण्डसँग भेट गरे । भेटको विषय सार्वजनिक नभएपनि नेता गौतमले आफु पार्टी विभाजन रोक्ने प्रयासमा रहेको बताउँदै आएका छन् । पूर्व एमालेबाट झलनाथ खनाल, माधवकुमार नेपाल जस्ता प्रभावशाली नेताहरु ओली समूहबाट अलग भएर ओलीमाथि गाली र आलोचनाको वर्षा वर्षाइरहँदा उनि भने अझै तटस्थ नै देखिएका छन् । ओली समूह र प्रचण्ड–माधव समूह नै गौतमलाई आफ्नो पक्षमा तान्ने होडमा उत्रिएका बेला उनि भने पार्टी एकता कै पहलमा लागेको बुझिएको छ ।
यसअघि गौतमले प्रचण्ड–माधव गुटमा पटकपटक सहभागि भएका छन् चाहे त्यो निर्वाचित सांसदलाई राजीनामा दिन लगाएर आफू निर्वाचित हुने योजना होस् या ओलीको राजीनामा माग्ने बखत । प्रतिनिधिसभा चुनावमा पराजित भएपनि संसदमा प्रवेश गर्ने चाहनाका कारण नेता गौतम यसअघि कहिले ओलीको पक्षमा त कहिले प्रचण्ड–माधवको पक्षमा ढल्कने गरेका थिए । दुवै गुटलाई उनले विगतमा आफना पक्षमा पार्न सफल भएका उदाहरण छन । गत वैशाख ८ गते प्रधानमन्त्री ओलीले दल विभाजन र संवैधानिक परिषद्सम्बन्धी अध्यादेश जारी गरे । त्यतिबेला नेकपा विवाद चर्कियो । प्रचण्ड–नेपाल गुट सक्रिय भई वैशाख १७ गते बसेको केन्द्रीय सचिवालय बैठकमा ओलीको राजीनामा माग गर्ने गौतम पनि थिए । तर राष्ट्रिसभामा लैजाउन उधारो प्रतिबद्धताका कारण नेकपा विवाद समाधानमा ठूलो भूमिका खेल्यो । गत असार १४ गते ओलीले नेपालको नयाँ राजनीतिक तथा प्रशासनिक नक्सा सार्वजनिक गरेपछि भारतले आफुलाई प्रधानमन्त्रीबाट हटाउन लाग्यो भनि ओलीले सार्वजनिक अभिव्यक्ति दिएपछि नेकपा विवाद चरम विन्दुमा पुगेको थियो । त्यतिबेला प्रचण्डलगायत स्थायी कमिटी सदस्यहरुले ओलीको राजीनामा मागे । तर त्यस्तो परिस्थितीमा नेता गौतमले प्रधानमन्त्री र पार्टी अध्यक्ष दुवैपदबाट राजीनामा दिनुनपर्ने गरी ६ बुँदे प्रस्ताव अघि सारे । पछि गौतमलाई राष्ट्रियसभा सदस्य बनाउन ओली सहमत भएका थिए । यसअघि विभिन्न बहानामा कहिले ओली गुट त कहिले प्रचण्ड–माधव गुटमा खेल्दै आएका गौतम राजनीतिक रुपमा नेकपा विभाजन भइसक्दा भने तटस्थ बसेका छन् । नेकपा एमाले फुटाएर नेकपा माले हुँदै पछि नेकपा एमालेमै फर्किएका गौतमले एकिकृत पार्टी नेकपालाई यसअघि पटक पटक दुर्घटना हुनबाट जोगाएकै हुन् । अहिले ओली र प्रचण्ड–माधव समूह मिल्ने सम्भावना समेत टरिसक्दा अझै ओली र प्रचण्डलाई मिलाउन गौतम सक्रिय भएका छन् । उनले यसका लागि एकता अभियान नै चलाउन लागेका छन् । महाकाली सन्धीको विपक्षमा उभिएका गौतमले २०५४ को महाधिवेशनपछि पार्टी फुटाएर नेकपा माले गठन गरे, पछि संसदीय राजनीतिक वृत्तमा एक्लो हुने अवस्था आयो । त्यसबेला सशस्त्र संघर्षरत प्रचण्ड नेतृत्वको माओवादीमा समेत जान नसकेपछि उनि नेकपा एमाले मै फर्किए । गाउँ गाउँसम्मका नेता कार्यकर्ता ओली वा प्रचण्ड–माधव गुटमा लागिसक्दा, कानूनी रुपमा नेकपा र सूर्य चिह्न आफ्नो बनाउने, दुवै गुटले आफूलाई वैध साबित गराउन अनेक हत्कण्डा अपनाइरहँदा बामदेव भने पार्टी एकताकै अडानमा रहेको दाबी गरिरहेका छन । नेकपा फुट रोक्ने भनेर लागेका गौतम अहिलेपनि एक्लिएका छन्, एकअर्काको चर्को आलोचनामा उत्रिसकेका ओली, प्रचण्ड–माधवलाई एक बनाउने उनको यो सक्रियताले कत्तिको सफलता पाउँछ त्यो भने हेर्न बाँकी छ । एमालेबाट माले, मालेबाट फेरि एमाले हुँदै नेकपामा आइपुगेका गौतम पूर्व एमालेका धेरै सदस्यहरु प्रचण्ड निकट हुँदा उनले ओलीलाई रोज्छन् कि प्रचण्डलाई ? यदि नेकपा एक बनाउन असफल भएको अवस्थामा नागरिकस्तरमा चर्चा चलेझैँ बामदेव गौतमले कुनै पक्षको समर्थन नगरी नेकपा फुटबाट असन्तुष्ट भएका पूर्व एमाले र पूर्व माओवादीलाई साथमा लिई नयाँ पार्टी घोषणा गर्ने पो हुन कि ? भिन्न गुटमा भिन्न तरिकाले रमाइरहेका गौतम पूर्व सहकर्मीहरुले कित्ता क्लियर गरिसक्दा के को पर्खाइमा छन् त ?
