१७ पुस, काठमाडौं ।
प्रधानमन्त्री केपी शर्मा ओलीले जनतामा निराशा फैलाउने काम नगर्न राजनैतिक दलका नेता तथा कार्यकर्ताहरूलाई आग्रह गरेका छन्।
नेपाल कम्युनिष्ट पार्टी (नेकपा) को भातृ संगठन प्रवासी नेपाली एकता मञ्चको कार्यक्रममा सञ्चार एप्लीकेसन जुम मार्फत आज सम्बोधन गर्दै प्रधानमन्त्री ओलीले दलहरूको अल्पमत र बहुमतको विवाद आगामी निर्वाचनको परिणामले समाधान गर्न हुनाले अहिले जनतामा निराशा आउने काम नगर्न आग्रह गरे।
प्रधानमन्त्री ओलीले निराश जनता देशको विकास र अग्रगमनका लागि घातक हुने हुनाले जनतामा आशा जगाउने काम गर्न सबैलाई आग्रह गरे।
प्रधानमन्त्री ओलीले अहिले नेपाल कम्युनिष्ट पार्टी (नेकपा) भित्र तथा देशमा भइरहेका विबाद र समस्याहरू एउटा सामान्य झट्का मात्र भएको र छिट्टै देशले नयाँ गति लिने बताए।
प्रतिनिधि सभा विघटनपछि सत्तारूढ नेकपा विभाजन नभएको तर केही मानिसहरू अलग भएर गएको तथा उनीहरू प्रतिगमनको यात्रामा रहेको रहेको समेत प्रधानमन्त्री ओलीले बताए।
