१९ पुस, काठमाडौँ ।
कामचलाउ सरकारका प्रधानमन्त्री तथा नेकपा (ओली पक्ष)का अध्यक्ष केपी शर्मा ओलीले नेकपा विभाजन गर्नका लागि गएको वैशाख १३ देखि पुस ४ गतेसम्म पुष्पकमल दाहाल र माधवकुमार नेपाल पक्षले ३ सय १५ बैठक गरेको बताएका छन् ।
अखिल नेपाल राष्ट्रिय स्वतन्त्र विद्यार्थी युनियनको केन्द्रीय कमिटीद्वारा आयोजित बृहत कार्यकर्ता भेलालाई कार्की ब्यांक्वेटमा सम्बोधन गर्दै उनले वैशाख १३ गतेदेखि पुस ४ गतेसम्म ३ सय १५ बैठक बसेकामा २ सय ८० बैठक दाहाल निवास खुमलटारमा बसेको बताए । ‘वैशाख १३ देखि पुस ४ सम्म खुमलटारमा मात्रै पार्टी फुटाउने बैठक २८० बसेका रहेछन् । गनेर मैले रेकर्ड हेरेँ । ३५ बैठक बाहिर बसेका रहेछन्, कहिले कोटेश्वर, कहिले प्रेसिडेन्सियल कलेजमा, कहिले अँगेनाको डीलमा । अनि अर्याल होटेलमा । कहिले कसको घर त कहिले कसको घरमा,’ प्रधानमन्त्री ओलीले भने ।
उनले एक/दुई जनाका भेटलाई त्यसमा गणना नगरेको बताए । उनले जहाँ जो नेतालाई भेट्यो त्यहाँ नै हस्ताक्षर गराएर पार्टीबाट प्रधानमन्त्री तथा अध्यक्ष ओलीलाई हटाएको व्यहोरा टाँस्ने गरेको दाबी गरे । पार्टीका नेताहरूले सरकार र प्रधानमन्त्रीलाई खुइल्याउनमा ठूलो समय खर्च गरेको बताए । उनले सरकारलाई बदनाम गर्नमा शीर्ष नेताहरू लागेको धारणा राखे ।
ओलीले तोकिएको मितिमै चुनाव हुने बताएका छन्। उनले चुनाव नहोला कि भनेर भनेर भ्रममा नपर्ने आग्रह गरे। ‘कतिपय व्यक्ति र शक्तिहरुले चुनाव हुँदैन भनेर भ्रम फैलाउन खोजिरहेका छन्। साथीहरुलाई आग्रह गर्न चाहन्छु- भ्रममा नपर्नुस्। वैशाख १७ र २७ गते चुनाव हुन्छ। कसैले पनि टार्न सक्दैन। चुनाव तोकिएकै समयमा हुन्छ’, उनले भने।
