२६ पौष, काठमाडौं । प्रधानमन्त्री केपी शर्मा ओलीले अहिलेको सरकारले इतिहासमा ’रेकर्ड’ कायम राख्ने धेरै काम गरेको दाबी गरेका छन् ।
एकैदिन तीन सय नौ अस्पताल शिलान्यास गरेर सरकारले अहिलेसम्मकै रेकर्ड कायम गरेको उदाहरण दिँदै उनले यस्ता थुप्रै काम अहिलेको सरकारले गरेको बताए ।
यसअघि एक वर्ष हैन धेरै वर्षसम्म पनि यो सङ्ख्यामा अस्पताल बनाउन शिलन्यासको कामसमेत नभएको भन्दै उनले सरकारले जनजीविकाका सवालमा धेरै काम गरेको बताए ।
आइतबार राष्ट्रिय सभामा सम्बोधन गर्दै प्रधानमन्त्री ओलीले अब गफ फिट्ने दिन गएको समेत बताए । गफ गरेर बसेर मात्रै नहुने भन्दै उनले काम गरेर त्यसको उपलब्धि देखाउनुपर्ने बताए । आफूले गल्ती गरेको रहेछ भने नागरिकले दण्ड दिने भन्दै उनले खुट्टा नकमाइकन चुनावी मैदानमा आउन आह्वान गरे ।
यसैबीच उनले सरकारले नागरिकमा जागरण फैलाएकै कारण कोरोनालाई थप भयावह हुनबाट बचाएको दाबी गरेका छन् । उनले अनिवार्य हात धुन, विभिन्न जडीबुटीको प्रयोग गर्न र तातो पानी खान सल्लाह दिएर कोभिडसँग सामना गरिरहेको बताए ।
उनले कोरोनाविरुद्धको खोप ल्याउने तयारीमा सरकार रहेको र केही समयमै कोभिडको समस्या समाधान हुने विश्वास गरे । नेपाली नागरिकको जीवन नै सरकारको सबैभन्दा पहिलो प्राथमिकतामा रहेको उनको भनाइ छ ।
