६ माघ, काठमाडौं ।
प्रतिनिधिसभा विघटन राजतन्त्र पुनःस्थापना गर्ने प्रक्रियाको सुरुवात भएको नेकपा प्रचण्ड–माधव समूहका अध्यक्ष पुष्पकमल दाहाल प्रचण्डले बताएका छन् ।
प्रचण्ड–माधव समूह सम्वद्ध नेपाल प्रेस संगठनको भेलालाई सम्बोधन गर्दै प्रचण्डले संसद विघटन गर्न प्रधानमन्त्रीले गरेको सिफारिसमा राजाको भाषा ह्वास्स गन्हाएको टिप्पणी गरे । ‘यो राजतन्त्र पुनःस्थापित गर्ने, निरंकुशतातिर धकेल्ने प्रक्रियाको जो सुरुवात भएको छ, यसलाई हर मूल्यमा रोक्नु छ’ उनले भने ।
आफैंले प्रस्ताव गरेको प्रधानमन्त्री केपी शर्मा ओलीले जनतामा निहित सार्वभौमसत्तामाथि आक्रमण गरेकाले आफूमा आवेग, घृणा र आक्रोश रहेपनि अधैर्य नभएको प्रचण्डले बताए । उनले अघि भने, ‘विधि पद्धतिबाट प्रतिगमन सच्याउन चाहेका छौं ।’
संसद भंग गरेर ओलीले देशलाई संविधानविहीनता र तानाशाहीको भूमरीमा लैजान खोजेको प्रचण्डले बताए । संविधानसभा जनताको आन्दोलनबाट आएको र यसको रक्षाका लागि अब जनतामै जाने उनले बताए ।
प्रचण्डले भने, ‘मैले त बुझेको छु, अब केपीको हातमा केही छैन । जुन दिन उहाँले संसद भंग गर्न सिफारिस गर्नुभयो, त्यो दिनबाट उहाँको हातमा केही छैन, अब अन्तै छ चिजहरु ।’ यस्तै उनले पूर्वएमालेलाई विश्वासमा किन लिन नसकेको भन्दै प्रधानमन्त्रीलाई प्रश्न गरेका छन् ।
उनले पूर्वएमालेमा खेलेको भन्ने आरोपलाई चिर्दै भने, “पूर्वएमालेमा मैले खेलेँ भन्नुहुन्छ उहाँले । म के भन्छु भने ५० वर्षदेखि काम गरिरहेका, कोहीले १५ वर्षदेखि गरेका, कोहीले १० वर्ष पार्टीको नेतृत्व गरेका माधव नेपाल, झलनाथ खनाल प्रधानमन्त्री भइसकेका ।
देशको राजनीतिक रुपमा स्थापित व्यक्तिवलाई तपाईं ५० वर्षदेखिसँगै हुनुहुन्थ्यो, तपाईंले विश्वासमा लिन नसक्ने, भर्खरै एकता गरेको प्रचण्डले सजिलै विश्वासमा लिन सक्ने कसरी भयो कमरेड केपी ओलीजी ?’’
उनले सचिवालयमा र स्थायी कमिटीमा बहुमत रहेको पूर्वएमालेलाई विश्वासमा लिन नसकेको र आफूलाई आरोप लगाएको बताए ।
“सचिवलायमा अत्याधिक बहुमत रहेको पूर्वएमालेलाई विश्वासमा लिन नसक्ने । आफ्नो अनुहार ऐनामा किन हेर्नु हुन्न ? स्थायी कमिटीमा नि बहुमत हुँदा प्रचण्ड नै ठिक भन्ने बनाएको केपी ओलीले कि प्रचण्डले ?,’’ उनले भने ।
केन्द्रीय कमिटीमा ७० प्रतिशतभन्दा बढी प्रचण्ड–माधवको पक्षमा आउने वातावरण ओलीको निरकुंश प्रवृत्तिले बनेको उनले बताए ।
