१० माघ, कञ्चनपुर।
नेपाली कांग्रेसका महामन्त्री डा शशांक कोइरालाले वैशाखमा निर्वाचनको सम्भावना नरहेको बताएका छन् ।
मुलुकमा राजनीतिक अवस्था अस्थिर हुँदै गएकाले वैशाखमा चुनाव नहुने उनले आशंका ब्यक्त गरेका छन् ।
कञ्चनपुरको महेन्द्रनगरमा आज आयोजित पत्रकार सम्मेलनमा उनले कम्युनिष्ट पार्टी फुटी नसकेको र निर्वाचन आयोगले दिने चुनाव चिन्हलगायतका कारणले निर्वाचन हुने सम्भावना नरहेकोे धारणा राखे ।
डा. कोइरालाले कांग्रेसको पहिलो प्राथमिकता प्रतिनिधि सभा पुनःस्थापना हुनुपर्ने बताए । उनले पार्टी महाधिवेशनका लागि क्रियाशिल सदस्यताको नामावली सङ्कलन गर्न नसक्नु र अहिलेको राजनीतिक परिस्थितीले गर्दा समयमा हुन नसकेको उल्लेख गरे ।
समयमा निर्वाचन गराउन नसक्नु पार्टीको कमजोरी रहेको उनको भनाइ थियो । मातृशोकमा रहेका नेपाली कांग्रेसका नेता दिलेन्द्रप्रसाद बडूलाई भेट्न महामन्त्री डा. कोइरालासहितका केन्द्रीय नेताहरुको टोली कञ्चनपुर पुगेको थियो।
