२१ माघ, काठमाडौँ ।
नेपाली कांग्रेसले संसदीय सुनुवाई विना नै संबैधानिक निकायका पदाधिकारी नियुक्ती गर्नुलाई सरकारको ‘सर्वसत्तावाद उन्मुख प्रवृत्तिको श्रृंखला’को संज्ञा दिएको छ । न्युज एजेन्सी नेपाल संग संक्षिप्त प्रतिक्रिया दिँदै प्रवक्ता विश्व प्रकाश शर्माले सरकारको सर्वसत्तावाद उन्मुख प्रवृत्ति विरुद्ध घनिभुत रुपमा संघर्षका कार्यक्रम संञ्चालन गर्ने बताए ।
एकपछि अर्को संबैधानिक व्यवस्थालाई उलंघन गरेर सरकार “संविधानलाई विखण्डीत गर्ने यात्रा”मा अघि बढेको प्रतिक्रिया दिए । उनले संबैधानिक परिषद् सम्बन्धी विश्वव्यापी व्यवस्थालाई उलंघन गर्ने गर्दै अध्यादेश ल्याउदा नै आफुहरुले असहमति जनाएको र अध्यादेश फिर्ता नगरिकन हुने कुनै पनि बैठकमा प्रमुख प्रतिपक्षी दलका नेताको सहभागीता नरहने कुरा निर्णयका साथ गरेको स्मरण गर्दै सरकारले पार्टी भित्रको आन्तरिक द्धन्द र दुईतिहाईको दंभका कारण संविधानलाई विखण्डीत गर्ने काम गरेको आरोप लगाए ।
उनले भने, “संसदीय सुनुवाईपछि मात्रै नियुक्तिको प्रक्रियालाई पुर्णता दिइने भन्ने हाम्रो संबैधानिक मर्म छ । त्यस प्रकारको व्यवस्था प्रष्ट छ । तर त्यो केही पनि नगरिकन आज एकाएक सपथ ग्रहण भयो । सपथग्रहण समारोह उपराष्ट्रपति स्वंयमले वहिष्कार गर्नुपर्ने, सभामुखको अनुपस्थित रहने, प्रमुख प्रतिपक्षी नेताको त स्वभाविक रुपमा अनुपस्थिति रहने भो । यो स्थिति जन्मनुको पछाडि दुईवटा कुराले प्रधानरुपमा काम गर्यो । एकातर्फ उहाँहरुसंग रहेको भनीएको दुई तिहाईको दंभ र अर्को तर्फ उहाँहरुको द्धन्द्धका कारणले आज संविधानलाई नै विखण्डीत गर्ने प्रकारको यात्रा उहाँहरुले अगाडि बढाउनुभएको छ । ”
उनले पछिल्लो कदमलाई सरकारको सर्वसत्तावाद उन्मुख प्रवृत्तिकै एउटा श्रृंखलाको रुपमा लिएको र त्यसविरुद्धको संघर्षलाई अझै घनीभूत बनाउनुपर्छ भन्ने निष्कर्षमा पार्टी पुगेको बताए ।
