२५ माघ, विराटनगर ।
प्रदेश १ को प्रदेशसभा बैठक अवरुद्ध भएको छ । सत्तारुढ नेपाल कम्युनिस्ट पार्टीको केपी ओली समूहले विरोध जनाएपछि बैठक अवरुद्ध भएको हो ।
आइतबार दिउँसो अबेर सुरु भएको बैठकमा सभामुख प्रदीपकुमार भण्डारीले बैठक प्रारम्भ भएको घोषणा गर्न नपाउँदै मुख्यमन्त्री शेरधन राई पक्षधरले उठेर बैठक अवरुद्ध पारेका हुन् ।
पटक–पटक बस्न आग्रह गर्दा पनि सांसदहरु नमानेपछि सभामुख भण्डारीले आगामी फागुन ९ गतेसम्मका लागि बैठक स्थगित गरेका छन् ।
सत्तारुढ दलका सांसदले संसदीय दलका नेताले निलम्बन गरेका १६ जना सांसदलाई प्रवेश गर्न दिएको भन्दै वैठक अवरुद्ध गरेपछि अविश्वासको प्रस्ताव दर्ता हुन पाएन । आजको बैठकमा मुख्यमन्त्री राईविरुद्ध संसद् सचिवालयमा दर्ता भएको अविश्वासको प्रस्ताव पेस हुने कार्यसूची थियो ।
