२६ माघ, काठमाडौँ । सुदूरपश्चिम प्रदेशसभाको हिउँदे अधिवेशन आजदेखि सुरु हुँदै छ ।
बजेट अधिवेशन भएको ५ महिनापछि आजदेखि हिउँदे अधिवेशन सुरु हुन लागेको हो । बैठक दिउँसो १ बजेका लागि बोलाइएको छ ।
गएको जेठ १३ गते देखि सुरु भएको सुदूरपश्चिम प्रदेशको बजेट अधिवेशन भदौ ३१ गते सकिएको थियो। आजको बैठकमा तीनवटा विधेयक पेस गर्ने कार्यतालिका रहेको प्रदेशसभा सचिवालयले जनाएको छ । यसैबीच नेपाल कम्युनिष्ट पार्टी नेकपाको ओली समूहले मुख्यमन्त्री त्रिलोचन भट्टविरुद्ध अविश्वासको प्रस्ताव दर्ता गराउने तयारी गरेपछि सफल नहुने भएको छ ।
सुदूरपश्चिम प्रदेशमा ओली समूहका सांसदहरु अल्पमतमा रहेकाले उनीहरुको प्रयास असफल हुने देखिएको हो । प्रदेश सरकारबाट बाहिरिसकेको ओली समूहका सांसदहरुले अविश्वासको प्रस्तावका लागि प्रमुख प्रतिपक्षी दल नेपाली कांग्रेसको साथ खोजिरहेको बुझिएको छ ।
अहिले सुदूरपश्चिम प्रदेशसभामा ५३ जना सांसदमध्ये नेकपाका मात्रै ३९ जना रहेका छन् । उनीहरुमध्ये ७ जनामात्रै ओली समूहका रहेका छन् । यस्तै नेपाली कांग्रेसका १२ र जनता समाजवादी पार्टीका २ जना सांसद रहेका छन् । यसअघि वाग्मती प्रदेश र प्रदेश १ का मुख्यमन्त्रीविरूद्ध नेकपा प्रचण्ड(नेपाल समूहले अविश्वासको प्रस्ताव दर्ता गराइसकेको छ ।
