काठमाडौँ : कृषि तथा पशुपन्छी विकास मन्त्री पद्माकुमारी अर्यालले देशकै ठूलो तरकारी बजारलाई प्रत्यक्ष रूपमा किसानसँग जोड्ने गरी नीति ल्याउने सरकारको तयारी रहेको बताउनुभएको छ । कालीमाटी फलफूल तथा तरकारी बजारको मङ्गलबार अनुगमन गर्दै मन्त्री अर्यालले मन्त्रालयले किसानको पहुँच सीधै बजारमा जोड्न सक्ने नीति ल्याउने तयारी गरेको बताउनुभएको हो ।
मन्त्री अर्यालले उत्पादित वस्तुको बजारीकरणको व्यवस्था गर्नु आजको आवश्यकता भएकाले किसानलाई बजारको व्यवस्थापन गर्न उत्पादित वस्तुको बजारको ग्यारेन्टी सरकारले गर्ने प्रतिबद्धता व्यक्त गर्नुभयो । उहाँले उत्पादनलाई बढावा दिने तथा उत्पादनलाई बजारमा बिक्री हुने वातावरण बनाउन सरकारको तर्फबाट योजना ल्याउने बताउनुभयो ।
कालीमाटी बजारको अनुगमनका क्रममा कालीमाटी बजार विकास समिति, व्यवसायी, किसान र भरिया मजदुरसमेतको अवस्था बुझ्दै उहाँले कालीमाटीका सम्पूर्ण समस्या लिखित रूपमा समितिमार्फत ल्याउन निर्देशन दिनुभयो साथै मन्त्री अर्यालले बजारमा तरकारीको थोक र खुद्रा मूल्यदेखि बजारको सरसफाइ र अन्य व्यवस्थापनबारे पनि चासो राख्नुभएको थियो ।
कालीमाटी फलफूल तथा तरकारी बजारको साधारण सभासम्म मन्त्रालय र बजार व्यवस्थापन बसेर बेथिति अन्त्य गर्ने गरी व्यवस्थित गराउनका निम्ति योजना लिएर आउन पनि समितिलाई निर्देशन दिनुभयो ।
पत्रकारको जिज्ञासामा उहाँले जुनसुकै परिस्थिति आउँदा पनि अब किसानलाई मलको अभाव हुन नदिने गरी मलको भण्डारण स्थापना गर्ने तयारी भइरहेको जानकारी दिनुभयो । अहिले गहुँ लगाउने सिजनमा पनि मल पर्याप्त रहेको र किसानले सहज ढङ्गले मल प्राप्त गरेको उहाँले दाबी गर्नुभयो । बजारको स्टलहरूको बेथितिलाई नियन्त्रण गरी प्रणालीमा ल्याउनुपर्ने भन्दै मन्त्री अर्यालले कालीमाटी बजारको फोहोर व्यवस्थापनलाई वैज्ञानिक हिसाबले व्यवस्थापन गर्ने चुनौती रहेको बताउनुभयो ।, याे समाचार गाेरखापत्र दैनिकमा छापिएकाे छ ।
