२९ माघ, दमौली ।
कांग्रेस पूर्व सहमहामन्त्री गोविन्दराज जोशीमाथि गरिएको अनुशासनको कारबाही फिर्ता लिन जिल्ला कार्य समिति तनहुँले सिफारिस गरेको छ । बुधबार बसेको जिल्ला कार्यसमितिको बैठकले केन्द्रमा कारबाही फूकुवाका लागि सिफारिस गरेको हो ।
पार्टी सभापति बैकुण्ठ न्यौपानेले भने,‘‘जोशी सरबाट कुनै निवेदन आएन । तर वडाबाट कारबाही फुकुवाका लागि सिफारिस आएकाले त्यसलाई केन्द्रमा पठाउने निर्णय गरेका हौं ।’
यसअघि जोशी पक्षका केही नेता र सभापति न्यौपानेबीच कुराकानी भएको चर्चा चलेको थियो । न्यौपानेले त्यसलाई स्वीकारे । ‘केही नेताहरुले पनि फिर्ताका लागि पहल होस् भनेर भन्नुभएको थियो,’ उनले भने, ‘पार्टी सभापतिको हैसियतले बदलिंदो परिस्थितिमा कारबाही फुकुवाका लागि सिफारिस हुनुपर्छ भन्ने लागेर सिफारिस गरेका हौैँ।’
भीष्मराज आङदेम्बे नेतृत्वको समितिले २०७४ सालको प्रतिनिधिसभा निर्वाचनमा पार्टीका आधिकारिक उम्मेदवार हराउन भूमिका खेलेको भन्दै जोशीलाई अनुशासनको कारबाही गरेको थियो । जिल्ला कार्य समितिको सिफारिसका आधारमा केन्द्रले जोशीलाई पाँच वर्षसम्मका लागि सदस्यताबाट निष्कासनको निर्णय गरेको थियो । तर जोशीले आफू आधिकारिक उम्मेदवार पनि नरहेकाले कारबाहीको औचित्य नभएको जिकिर गर्दै आएका थिए ।
