२२ फागुन, काठमाडौं । ठूलो जनप्रर्दशनपछि प्राप्त उपलब्धिका रुपमा ब्याख्या गरिएको पुनस्र्थापित संसदको बैठक भोलि बस्दैछ । राजनैतिक रुपमा विभाजित सत्तापक्ष एकै बेञ्चमा बस्नेगरी व्यवस्था मिलाइएको छ तर सत्तारुढ दलका नेताहरु अघिल्लो दिनसम्म आफ्नै दलका नेताको खिसिट्युरी गर्न व्यस्त छन् ।
गत पुस ८ गते नेकपाको प्रचण्ड–माधव समूहले पुष्पकमल दाहाल प्रचण्डलाई संसदीय दलको नेता चयन गर्यो । सो समूहले शुक्रबार फेरि प्रचण्डलाई नै संसदीय दलको नेतामा चयन गर्यो । तर ओली समूहका नेताले भने यसमा व्यंग्य गरेका छन् । ओली समूहका नेता तथा लुम्बिनी प्रदेशका मुख्यमन्त्री शंकर पोखरेलले प्रचण्डलाई चर्चामा ल्याउन कै लागि दलको नेतामा चयन गरिएको भन्दै व्यंग्य गरेका हुन् । उनले सामाजिक सञ्जालमा लेखेका छन्–प्रचण्ड जत्तिको चर्चित नेतालाई विधि र प्रकृया नै नपुर्याई पटक पटक संसदीय दलको नेता चुनिएको भनेर चर्चामा ल्याउनु आवश्यक थियो र ? दलका नेता समेत रहेका प्रधानमन्त्री केपी शर्मा ओलीले असंवैधानिक ढंगले संसद विघटन गरेको भन्दै प्रचण्ड–माधव समूहले फागुन ८ गते ओलीलाई हटाएर प्रचण्डलाई दलको नेता चयन गरेको थियो । संसद् पुनस्र्थापना भएपछि विधिवत रुपमा शुक्रबार फेरि प्रचण्डलाई दलको नेतामा चयन गर्यो । बहुमत सांसदले दलको नेतामा चयन गरेको प्रचण्ड–माधव समूहको दाबी छ तर ओली समूहले भने विधिपूर्वक नबोलाइएको भन्दै चर्चामा आउनका लागि मात्र दलको नेता चयन गरिएको बताएको छ । भोलि पुनस्र्थापित संसदको पहिलो वैठक बस्दैछ । संसदीय दलमा बहुमत दाबी गर्ने प्रचण्ड–माधव समूहले राजीनामा मागेपनि प्रधानमन्त्रीबाट ओलीले राजीनामा नदिएपछि प्रचण्ड–माधव समूह कांग्रेससँग मिलेर अविश्वास प्रस्ताव लैजाने प्रयासमा छ । कांग्रेसलाई सरकारको नेतृत्व दिने गरी लबिङ गरेपनि कांग्रेसको एक खेमा सरकारको नेतृत्व गर्न तयार छैन । तर ओलीविरुद्ध सडकबाट आगो ओकलेको कांग्रेसले प्रचण्ड–माधव समूहलाई अविश्वास प्रस्तावमा सघाउँदै नयाँ सरकार गठनमा समर्थन गर्ने सम्भावना छ । अविश्वास प्रस्ताव प्रचण्ड–माधव समूहले राखेर आफ्नै नेतृत्वमा नयाँ सरकार गठन गर्ने सहमति भए भर्खरै चयन गरिएका दलका नेता प्रचण्डलाई प्रधानमन्त्रीका रुपमा प्रस्ताव गर्ने संभावना छ ।
