४ चैत, काठमाडौं । नेकपा माओवादी केन्द्रका नेता दिनानाथ शर्माले काठमाण्डौमा बुधबार आयोजित कार्यक्रममा वर्तमान समयमा नेता र नेतृत्वको संकट देखा परेको बताएका छन् ।
उनले नेतृत्वले पार्टी भित्रको अन्तरविरोध समाधान गर्नसक्नुपर्नेमा त्यसो हुन नसकेका कारण मुलुक संकटमा परेको बताए । पार्टी विभाजन हुनु दुखद कुरा भएको भन्दै उनले पार्टीभित्र उत्पन्न अन्तरविरोधहरुलाई जिम्मेबार नेताले समाधान गर्नुपर्ने धारणा राखे । जनताले ५ बर्ष सरकार सञ्चालन गर भनेर पठाएपछि आन्तरिक अन्तरविरोध समाधान नगरेर जनप्रतिनिधि संस्था विघटन गर्ने प्रधानमन्त्री ओलीमा असल नेतृत्वको गुण नभएकाले आफुले नेता मान्न नसक्ने स्पष्ट पारे ।
नेपाली कांग्रेसका नेता रमेश लेखकले काठमाण्डौमा बुधबार आयोजित कार्यक्रममा आवश्यकता परे नेपाली कांग्रेस सरकारको नेतृत्व गर्न तयार रहेको बताएका छन् । आफुहरुले प्रतिपक्षीको भुमिका पाएकाले सरकार बनाउने चाहाना र रहर नभए पनि आवश्यकता परे सरकार बनाउन तयार रहेको उनको भनाई छ । सरकार चलाउने जनादेश दिएको पार्टी सरकार सञ्चालनमा सक्षम भएन भने र स्थिरता दिन सकेन भने स्वभाविक रुपमा सरकारको नेतृत्व गर्ने जिम्मा प्रतिपक्षीले पाउने उनको भनाई छ ।
