३१ जेठ, काठमाडौँ ।
जनता समाजवादी पार्टी (जसपा)का संघीय परिषद् अध्यक्ष डा. बाबुराम भट्टराईले निर्वाचन आयोगको भूमिकामाथि प्रश्न उठाएका छन् ।
सोमबार सामाजिक सञ्जालमार्फत भट्टराईले जसपाका दुवै पक्षले गरेका कारबाहीका निर्णयलाई आयोगले अमान्य भनेपछि गम्भीर चिन्ता प्रकट गरेका हुन् । यसक्रममा भट्टराईले प्रधानमन्त्री केपी शर्मा ओलीलाई पनि जोडेर वादी र प्रतिवादी वादी मिलेर बस्नु पर्ने फैसला आएकामा असन्तुष्टि जनाएका छन् ।
‘खड्गप्रसाद एण्ड कम्पनीको नयकका विधिशास्त्रः कसैले चोर्यो भने चोरी गर्नेको विरूद्ध मुद्दा हाल्नू ! चोरलाई पनि मैले चोरेको हैन,उल्टै मुद्दा हाल्ने (वादी)ले चोरेको हो भनेर प्रतिवाद गर्न लगाउनू।मुद्दा हेर्ने कार्यालयले दुवै वादी र प्रतिवादी चोर हुन्,मिलेर बस्नू भन्ने फैसला गर्नू! वाह!’ उनले भनेका छन् ।
जसपाका एक अध्यक्ष महन्थ ठाकुरको पक्ष र अर्का अध्यक्ष उपेन्द्र यादवको पक्षले एकअर्कालाई गरेको कारबाही आयोगमा पुगेको थियो । त्यसमा आइतबार आयोगले दुबै पक्षले एक अर्कालाई गरेको कारवाही कानूनसम्मत नरहेको र पुरानै पदाधिकारी कायम रहने फैसला गरेको थियो ।
