१३ असार, काठमाडौं ।
संस्कृति, पर्यटन तथा नागरिक उड्डयन मन्त्री लीलानाथ श्रेष्ठले कोभिड–१९ महामारीका कारण थला परेको पर्यटन व्यवसायलाई माथि उठाउन पहल गर्ने प्रतिबद्धता जनाएका छन् ।
सिंहदरबारमा आइतवार संस्कृति, पर्यटन तथा नागरिक उड्डयन मन्त्रालयको पदभार सम्हाल्दै उनले आफू मन्त्रालयमा रहुञ्जेल पर्यटन क्षेत्र तथा पर्यटन व्यवसायको विकास र समृद्धिका लागि काम गर्ने बताएका हुन् ।
रहरले नभइ बाध्यताले मन्त्रालयको जिम्मेवारी सम्हाल्नु परेको उल्लेख गर्दै उनले कोभिड–१९ महामारीको अत्यन्तै कठिन अवस्थामा पनि पर्यटन क्षेत्रको सम्मुनत विकासका लागि भिन्न किसिमको कार्ययोजना बनाइ अघि बढ्नुपर्नेमा जोड दिए ।
सरकारले नीति ल्याउने तर कार्यान्वयन तहमा लैजाने जिम्मेवारी कर्मचारीहरूको भएको भन्दै उनले समग्र मन्त्रालयका कामलाई प्रभावकारी बनाउने गरी कार्ययोजना बनाउन मातहतका कर्मचारीलाई निर्देशन दिए ।
उनले भने , ‘मैले थप जिम्मेवारी पाएको कुनै रहरले होइन बाध्यताले हो । अहिलेको परिस्थितिले हो । म जति दिन यहाँ हुन्छु त्यति दिन यो मन्त्रालयलाई कसरी राम्रो गर्न सकिन्छ, गर्नेछु । त्यसमा तपाईँहरू (कर्मचारी) को सहयोग चाहिन्छ ।
तपाईँहरूले नै गर्ने हो । समस्या आउन नदिने गरी काम गर्नुहोस् । नीतिगत कुरा सरकारले गर्ने हो तर कार्यान्वयन कर्मचारीले गर्ने हो । तपाईँहरू राज्य सञ्चालनको स्थायी संयन्त्र हो । कार्यान्वयन गर्ने तपाईँहरूले हो । कठिन अवस्थामा रहेकाले कसरी काम गर्न सकिन्छ भनेर तत्कालीन, मध्य र दीर्घकालीन कार्ययोजना बनाउनुहोस् ।’
मन्त्री श्रेष्ठले नेपाल वायु सेवा निगमले विभिन्न समयमा जहाज किन्दा देखिने गरेका समस्याको पनि अध्ययन गर्ने बताए ।
