१५ असार, वीरगंज ।
चट्याङ लागेर पर्सामा ३ जनाको मृत्यु भएको छ।
मंगलबार बिहान पानीसंगै परेको चट्याङले अन्य ४ जना घाइते भएका छन् । घाइतेमध्ये १ को अवस्था गम्भीर रहेको छ । तीन जना सामान्य घाइते भएका छन्।
मृत्यु हुनेमा पर्साको पटेर्वासुगौली गाउँपालिकामा दुई र जीराभवानी गाउँपालिकामा एक रहेका छन् । पटेर्वासुगौली–४ पथरैयामा भैंसी चराउन गएका सोही वडाको देउरबाना बस्ने ५५ वर्षका रघुबिर यादवको चट्याङ लागेर मृत्यु भएको छ ।
सोही पालिका वडा नम्बर–१ गदियानी बस्ने वर्ष २७ को रोसलान गदीको मृत्यु भएको हो। सोही स्थानका राजबली गदी भने चट्याङ लागेर गम्भीर घाइते भएको र उनको नारायणी अस्पताल वीरगंजमा उपचार भइरहेको पर्सा प्रहरीका प्रवक्ता डिएसपी ओमप्रकाश खनालले बताए।
त्यस्तै जीराभवानी गाउँपालिका वडा नम्बर–३ जितपुर बस्ने बर्ष ५० कि असतुरनी देवी थरुनीको पनि चट्याङ लागेर मृत्यु भएको छ। जीराभवानी गाउँपालिकाका चट्याङ लागेर तीनजना समान्य घाइते भएका छन्।
चट्याङले मृत्यु भएका तीनै जनाको घटना स्थलको मुचुल्का गरी शव पोष्टमार्टमका लागि नारायणी अस्पतालमा ल्याउने काम भइरहेको प्रहरीले जााएको छ।
